Япония бош вазири девонхонаси Хитойнинг қоровул кемаси мамлакатнинг ҳудудий сувларига киргани учун инқироз штабини тузди, дея хабар беради «РБК».
Ҳодиса душанба куни Шарқий Хитой денгизидаги баҳсли ороллар ҳудудида содир бўлган.
Япония ҳукумати маълумотларига кўра, Хитойнинг тўрт патруль кемаси Япониянинг ҳудудий сувларига яқинлашган, улардан бири Сенкаку ороллари яқинидаги чегарани кесиб ўтган.
Хитой ушбу оролларни Дяоюйдао деб атайди ва уни ўзиники деб ҳисоблайди.
Инқироз штаб-квартираси келгуси вазиятни кузатиш учун тузилган.
Пекин ноқонуний босиб олинган ҳудуд деб ҳисоблайдиган Дяоюйдао архипелаги 1895 йилда Хитой билан урушдан сўнг Япония назоратига ўтган.
Иккинчи жаҳон урушидан сўнг Дяоюйдао Америка ишғоли остида бўлган, кейин Қўшма Штатлар ушбу ҳудудларни Японияга топширган.
Урушдан сўнг Токио Тайванга бўлган ҳуқуқларини бекор қилган ва Пекиннинг мантиғига кўра, табиий газ конлари топилган Дяоюйдао оролини қайтариши керак бўлган.
Изоҳ (0)