Қашқадарё вилоятидаги Абдулла Орипов номли она тили ва адабиёти фанини чуқурлаштириб ўқитишга ихтисослаштирилган мактаб-интернатида «Алишер Навоий ҳаёти ва ижоди» мавзусида буюк сиймо таваллудининг 578 йиллиги муносабати билан ташкил этилган ноанъанавий дарсда вилоят ҳокими Зафар Рўзиев ҳам иштирок этди. Бу ҳақда вилоят ҳокимлиги матбуот хизмати раҳбари Бекзод Маматқулов маълум қилмоқда.
Вилоят ҳокими ўқувчиларга дастлаб Ўзбекистонда олиб борилаётган ўзгаришлар, таълим тизимида амалга оширилаётган ислоҳотлар борасида гапириб берди.
Шунингдек, дарсда жаҳон тан олган буюк сиймолар, уларнинг босиб ўтган йўллари, қолдирган бой мероси хусусида сўз борди. Вилоят ҳокимининг Алишер Навоий, Абдулла Орипов ҳаёти ва ижодий фаолияти борасидаги фикр-мулоҳазалари ўқувчилар учун айниқса, қизиқарли бўлди.
«Вилоят ҳокими билан учрашув, шахсан ҳокимнинг ўзи дарсга кириб, болалар билан суҳбатлашгани ўқувчиларимиз учун ҳар жиҳатдан ватанпарварликка, ҳаётга теран кўз билан боқиб, яратилган имкониятлардан унумли фойдаланишга ундайдиган муҳим дарс бўлди», — дейди она тили ва дабиёти фани ўқитувчиси Нафосат Азизова.
Дарс сўнгида мактабнинг иқтидорли, ўтган йиллар давомида маълум ютуқларни қўлга киритган ўқувчилари вилоят ҳокимининг совғаси — китоблар тўплами билан тақдирланди.
Изоҳ (0)