Турғунбоев иши ёпилди. Кимга аза, кимга тўй?

Ўзбекистон футбол ассоциацияси 5 февраль куни бир вақтда иккита клуб билан шартнома тузишда гумон қилинган Азиз Турғунбоев масаласини кўриб чиқиб, ишга якун ясади.

Футбол мутахассиси Алишер Никимбаев Telegram’даги каналида мазкур воқеага қуйидагича муносабат билдирди.

Шундай қилиб Турғунбоев иши кўриб чиқилди, қарор қабул қилинди.

Натижа эса қуйидагича:

1. Футболчи дисквалификация қилинди;
2. Иккала жамоа билан тузилган шартномаси бекор қилинди;
3. Иккала клубнинг ишчилар жамоаси ҳамда «Навбаҳор»нинг собиқ бош мураббийи Илҳом Мўминжонов дисквалификация қилинди.

Қарорнинг асослаш тафсилотларига тўхталмасдан туриб, мазкур вазиятдан сўнг ким ютди, қайси бири эса ютқазди, деган саволларни бериб кўрамиз:

Ғолиблар.

1. «Навбаҳор». Наманган клуби ўтган йили ўз ўйинчиси учун курашда яққол мағлуб бўлди, аммо «Пахтакор» билан музокаралар олиб бориш ўрнига (ЎФА матбуот хизматининг хабар беришича, 3 декабрь куни «Навбаҳор» томонидан ўзига босим бўлаётгани ҳақида футболчи мурожаат қилган), бошқа усулларни қўллаган, натижада эса ўйинчи икки ўт орасида қолган. Охир-оқибат «Пахтакор» билан тузилган шартнома бекор қилинган. Энди, эҳтимол, дисквалификация муддати тугагандан сўнг «Навбаҳор» Турғунбоевга янги шартнома таклиф қилади. «Пахтакор»га эса ҳеч қандай товон пули тўланмайди.

2. Турғунбоев. Ҳа, у дисквалификация қилинди. Бироқ икки клуб билан шартнома тузганлиги сабабли жазодан қутулиб қолмаслиги аниқ эди. Аммо 9 июль куни унинг дисквалификация муддати тугайди (агар ЎФА сайтига ростан ҳам ишонадиган бўлсак). Қарор қабул қилинган кундан бошлаб ҳисобланса, 6 ойдан камроқ вақтни ташкил этади. Бундан ташқари Турғунбоевнинг ўтказган сўнгги расмий учрашувидан ҳисоблайдиган бўлсак (21 январь куни Осиё Кубогида Австралияга қарши кечган баҳс), шунда ҳам 6 ойга етиб бормайди. Осиё Кубоги сўнгги учрашувидан сўнг, Қримда бўлиб ўтган йиғинда «Навбаҳор» таркибида иштирок этди ва «Пахтакор» билан тузган шартнома қоидаларини бузди. Бир сўз билан айтганда, Турғунбоевнинг омади чопди, чунки у эълон қилинганидан кўра камроқ дисквалификация олди.

Ютқазганлар.

1. «Пахтакор». Тошкент клуби ЎФА ва ОФКдан рўйхатдан ўтган, у билан шартнома имзолаган футболчини йўқотди. Бундан ташқари шартнома эндиликда ҳақиқий эмас, футболчи компенсациясиз бошқа клубга ўтиши мумкин.

Шу ўринда битта нарсага эътиборни қаратиш лозим:

Турғунбоев 2018 йилнинг 3 декабрь куни «Пахтакор»да ўйнашни истаётгани, бироқ унинг бу қарорига «Навбаҳор» томонидан босим бўлаётгани ҳақида ўз қўли билан ариза ёзиб кетган (ҳар ҳолда ЎФА сайтида шундай ёзилган). Аммо сўнгги икки ой давомида босим пасаймаган, натижада футболчи шартнома шартларини бузишга мажбур бўлди. Энди ЎФАнинг футболчиларни ҳимоя қила олиш ҳақидаги мурожаатига ким ишонади? Турғунбоев мурожаат қилди, ҳаммаси қандай якун топди?