Биринчи марта сезиларли антибактериал таъсирга эга бўлган пенициллин олинганидан сўнг, инсоният саломатлиги учун курашнинг янги даври бошланди, деб ёзади TravelAsk.
Ўтган 90 йил давомида олимлар томонидан бошқа кўплаб антибиотиклар кашф этилиб, синтез қилинган ва оламлар аллақачон касаллик тарқатувчи микроорганизмларга чидамли бўлиши керак эди. Бироқ бактериялар тури кўпайиб, антибиотикларга чидамли бўлиб бормоқда.
Олимлар янада кучли антибиотик яратиш учун янги дори воситалари синтези борасидаги лаборатория тадқиқотларини давом эттирмоқда. Аммо бунинг муқобил йўли ҳам мавжуд — бактерияларга қарши ноёб биологик ҳимояга эга бўлган ҳайвонот дунёси вакиллари орасида янги актибиотикни қидириш.
Бунинг учун олимларга ёввойи табиатда яшовчи ўнлаб ҳайвонлар турларини тадқиқ этишларига тўғри келади. Хусусан, яқинда россиялик ва америкалик олимларнинг ҳамкорликдаги илмий тадқиқот гуруҳи стафиллокок ва бир қатор хавфли микроорганизмларнинг ривожланишини олдини олувчи антибиотикни аниқлаган.
Амикумацин (амикумацин А) деб аталувчи ушбу антибиотик Сибирнинг қўнғир айиғи сўлагидан ажратиб олинган микроорганизмлар томонидан ишлаб чиқарилади. Лаборатория шароитида ўрганилганда у жуда яхши натижалар кўрсатган.
Албатта олимлар олдида ҳали кўп тадқиқотлар ва тажрибалар ўтказиш турибди. Бироқ ушбу антибиотикдан катта натижалар умид қилинмоқда.
Изоҳ (0)