Венесуэла Олий суди мухолифат етакчиси Хуан Гуайдога мамлакатни тарк этишни тақиқлаган ва мамлакат ҳудудидаги банк ҳисоб-рақамларини ёпиб қўйган, дея хабар беради «Коммерсантъ».
Венесуэла президенти Николас Мадуро ҳозирча Хуан Гуайдони ҳибсга олиш учун ордер йўқлигини айтган.
«Ички конституциявий ва суд жараёнлари бўйича натижалар қандай бўлишини кутайлик. Давлат раҳбари сифатида мен ҳозирда конституциянинг бузилиши, давлат тўнтарилиши кетяпти деган фикрдаман. Бироқ бу давлат раҳбарининг фикри холос. Қарорни прокуратура ва судлар қабул қилади», — дейди у.
Аввалроқ, Бош прокурор Вильям Сааб жаноб Гуайдога нисбатан «конституцион тузумни бузганлик учун жиддий жиноятлар»га алоқадор сифатида тергов бошланганини айтган.
Кейинчалик АҚШ президентининг миллий хавфсизлик бўйича маслаҳатчиси Жон Болтон департамент қарорини қоралаган ва сиёсатчига зарар етказганларни «жиддий оқибатлар» кутаётгани билан таҳдид қилган.
23 январь куни Венесуэла мухолифати етакчиси Хуан Гуайдо ўзини вақтинча президент деб эълон қилган. Уни Қўшма Штатлар, Канада ва бир нечта Европа мамлакатлари қўллаб-қувватлаган. Армия ҳозирча президент Николас Мадуронинг томонида.
Изоҳ (0)