Президент қарорига мувофиқ, Инвестициялар ва ташқи савдо вазирлиги ҳузурида бир қатор янги тузилмалар ташкил этилади.
Жумладан:
Идоралараро божхона-тариф кенгашини тугатган ҳолда Тариф ва нотариф тартибга солиш кенгаши;
Чет эл инвесторларини маълумотлар билан таъминлаш ва ҳуқуқий кўмак бериш, шунингдек, юзага келган муаммоларни ҳал этиш, зарурий ҳужжатларни расмийлаштириш бўйича уларга хизмат кўрсатиш учун Хорижий инвестицияларни жалб этиш агентлиги;
Илғор хорижий технологияларни излаб топиш, жалб қилиш ва жорий этишга, илмий ишланмаларни экспертиза қилиш, уларнинг миқёсини кенгайтириш ва тижоратлаштиришнинг самарали тизимини яратиш, илғор технологияларни ишлаб чиқувчи ва жорий этувчи корхоналарга давлат томонидан кўмак бериш механизмларини шакллантириш мақсадида Технологик ривожланиш агентлиги ташкил этилади.
2019 йил 1 июлдан бошлаб инвесторлар билан ўзаро алоқалар «ягона дарча» тамойили асосида амалга оширилади, унинг доирасида салоҳиятли инвесторларга консултация бериш, уларнинг давлат хизматларидан фойдаланиши, шу жумладан, муҳандислик-коммуникация инфратузилмасига уланишида ёрдамлашиш, шунингдек, инвестиция шартномаларини тузишда кўмаклашиш борасидаги ишлар бажарилади.
2019 йил 1 июнга қадар салоҳиятли инвесторларни қизиқтирувчи дастлабки ҳисоб-китобларга эга аниқ лойиҳалар ва бошқа маълумотларни кўрсатган ҳолда ҳар бир ҳудуднинг ишлаб чиқариш салоҳияти ва инвестиция ҳажмига бўлган эҳтиёжини акс эттирувчи Ўзбекистон Республикасининг интерактив инвестициявий харитаси ишлаб чиқилади.
Вазирликка Давлат активларини бошқариш агентлиги ва Молия вазирлиги билан биргаликда икки ой муддатда «Ўзбекозиқовқатхолдинг» ХКни тугатиш чораларини кўриш ва ушбу соҳада ўзини ўзи тартибга солувчи ташкилот тузиш бўйича таклифлар киритиш топширилди.
Изоҳ (0)