Интернет тармоқларида, «O‘zxalqharakati.com» сайтида Шаҳноза Бойқунусова номидан мурожаат тарқалмоқда. Унда аёл айбдор деб топилган жиноят иши бўйича суриштирув нохолис олиб борилганлиги, процессуал ҳужжатлар эса гўёки сохталаштирилганлиги таъкидланмоқда, деб ёзади Тошкент шаҳар ИИББ матбуот хизмати.
Вазирликнинг маълум қилишича, Тошкент шаҳрининг бир нечта туман ИИБларига жабрланувчилар номидан тушган аризалар асосида ҳеч қаерда ишламайдиган, 1981 йилда туғилган Ш.Бойқунусовага нисбатан Жиноят кодексининг 168-моддаси («Фирибгарлик») бўйича 5 та ҳолат юзасидан жиноят ишлари қўзғатилган.
Ш.Бойқунусова ва унинг шериклари томонидан жабрланувчиларга уларнинг пластик карталаридаги пул маблағларини нақд қилиб бериш ваъда қилинган, бироқ уларга берилган ваъдалар бажарилмасдан, алдов йўли билан ўзлаштирилган пуллар шахсий эҳтиёжлари учун сарфлаб юборилган. Етказилган зарарнинг умумий қиймати 387 миллион 970 минг сўмни ташкил этган.
Шу муносабат билан Ш.Б. 2 апрель куни ИИББга таклиф этилган ва қўлга олиниб, вақтинчалик сақлаш ҳибсхонасига жойлаштирилган. 3 апрель куни унга нисбатан айблов эълон қилинган. Суд жараёнида Бойқунусова етказилган моддий зарарни қоплаганлиги сабабли унга нисбатан озодликдан маҳрум этиш билан боғлиқ бўлмаган жазо тайинланган. 2018 йилнинг 18 октябрь куни Жиноят ишлари бўйича Шайхонтоҳур туман суди унга нисбатан 2 йил, 2 ой-у 13 кунлик ахлоқ тузатиш ишлари жазосини тайинлаган. Ҳукм 2018 йилнинг 28 октябрь куни кучга кирган.
ИИВ тергов қонун доирасида олиб борилганлиги ва суд ҳукмидан норози томонлар қонунда кўзда тутилган тартибда шикоят қилиши мумкинлигини маълум қилади ва тарқатилаётган хабарлар асоссиз эканлигини таъкидлайди.
Изоҳ (0)