Бандлик ва меҳнат муносабатлари вазирлиги янги ташкил этилган хусусий бандлик агентликларини рўйхатга олиш ва фуқароларни хорижда ишга жойлаштириш учун лицензия бериш амалиётини йўлга қўйди. Ушбу тизим асосида бугунги кунгача Самарқанд вилоятида 2 та хусусий бандлик агентлигига шундай лицензия берилди, дея хабар беради «Зарафшон».
— Фуқароларни хорижда ишлашга юбориш ваколати шу пайтгача фақат Ташқи меҳнат миграцияси масалалари агентлигида бор эди, — дейди агентликнинг вилоят филиали директори Абдуазиз Ҳафизов. — Эндиликда бу амалиёт билан лицензияга эга хусусий бандлик агентликлари ҳам шуғулланиши мумкин. Ҳозирда «Status 777» ҳамда «Amilee Bahora» МЧЖлар хусусий бандлик агентликлари лицензиясига эга, яна тўрт нафар тадбиркор бу иш билан шуғулланиш истагини билдириб, ҳужжатларини топширган.
Ҳозирда Япония, Польша, Жанубий Корея ва бошқа қатор ривожланган давлатларда ишлаш истагини билдирган фуқаролар мазкур хусусий бандлик агентликларига мурожаат қилмоқда.
— Аҳолини иш билан таъминлашда хусусий агентликларга катта ишонч билдирилгани айни муддао бўлди, — дейди «Status 777» МЧЖ директори ўринбосари Ҳабиба Маҳкамова. —Шу кунларда япониялик тадбиркорлар билан ҳамкорлик қилиш мақсадида ушбу давлатга боришга тайёргарлик кўряпмиз. Шунингдек, Польшадаги бир қатор саноат, ишлаб чиқариш корхоналари билан ҳам музокаралар олиб боаяпмиз.
Изоҳ (0)