Самарқандда «Ҳиндистон — Марказий Осиё» мулоқотининг биринчи сессияси бошланди

Самарқанд шаҳридаги Форумлар мажмуасида «Ҳиндистон – Марказий Осиё» мулоқоти ташқи ишлар вазирлари учрашувининг биринчи ялпи мажлиси ўз ишини бошлади. Бу ҳақда «Дарё» мухбири Фарҳод Норбўтаев хабар бермоқда.

Учрашувда ўзаро савдо ҳажмини оширишга кўмаклашиш, транспорт ва логистикани ривожлантириш, саноат, энергетика, ахборот технологиялари, тиббиёт, фармацевтика, қишлоқ хўжалигининг муҳим тармоқларига инвестициялар, инновация ва технологиялар жалб қилиш бўйича ҳамкорликнинг истиқболли йўналишлари, шунингдек, маданият, илм-фан, таълим ва туризм соҳаларида ҳамкорлик масалалари муҳокама қилинади.

Мажлисда Ҳиндистон ташқи ишлар вазири Сушма Свараж, Қирғизистон ташқи ишлар вазири Чингиз Айдарбеков, Қозоғистон ташқи ишлар вазири Бейбут Атамқулов, Тожикистон ташқи ишлар вазири Сирожиддин Муҳриддин, Туркманистон Вазирлар Маҳкамаси Раиси ўринбосари, ташқи ишлар вазири Рашид Мередов, Ўзбекистон ташқи ишлар вазири Абдулазиз Комилов иштирок этмоқда.

Тадбир аввалида Ўзбекистон ташқи ишлар вазири Абдулазиз Комилов мажлис иштирокчиларини самимий қутлаб, Афғонистон иштирокида биринчи марта янги форматда ўтказилаётган мазкур мулоқот Марказий Осиё мамлакатлари ва Ҳиндистон ўртасидаги савдо-иқтисодий, инвестициявий, маданий-гуманитар алоқалар ривожига кучли туртки беришини таъкидлади.

Вазирларнинг биринчи учрашуви якунлари бўйича Қўшма баёнот қабул қилиниши кўзда тутилган.