Таркибида QQС нархи қайд этилган касса чеклари ижтимоий тармоқлардаги муҳокамаларнинг марказида турди. Кўпчилик фойдаланувчилар шошма-шошарлик билан буни нархларнинг устига яна 20 фоиз қўшилиши, деб хулоса чиқарди. Бу ҳақда тадбиркор Зафар Ҳошимов фикр юритган.
Харид чекларимиз мазкур виртуал муҳокамаларда қайд этилмаганига қарамасдан (тармоғимиз дўконлари кеча ишламади, ходимларимизга бир кунлик ҳордиқ бердик. Бунинг устига маҳсулотларнинг нархлари таркибидаги QQС кўрсатилган қаторни ҳали чекларимизда жорий этмадик), чакана савдодаги ҳамкасбларимиз ҳимояси учун бир қанча омилларни келтиришни лозим топдим.Чекларни кўриб, шахсан ўзим шаҳримиздаги бир қанча супермаркетларни (бизнинг супермаркетларимиз ишламаганини яна бир бор ёдга солсам) айланиб чиқдим.
Харид қилиб, чек ҳамда нарх ёрлиқларидаги нархларни текширдим. Чекларда QQС билан биргаликда инобатга олинган нархлар кўрсатилган бўлишига қарамасдан, маҳсулотларнинг умумий қиймати, шу жумладан, QQС ҳам бир тийинга ошмаган эди. Харидорларнинг ўзлари ҳам бунга осонгина ишонч ҳосил қилишлари мумкин.
Барча нарх ёрлиқларида нарх ўрнатилган сана мавжуд. Шу таҳлит, пештахталарда нархи билан кўрсатилган ушбу маҳсулотларнинг барчаси октябр, ноябрь ва декабрь саналарида қайд этилган. Мен саналар билан бирга кўрсатилган юздан ортиқ нарх ёрлиқларини кўздан кечирдим. Чакана савдода нархлар ўсмаганига амин бўлдим.
Эҳтимол ушбу сўзларим айрим харидорларимиз учун бирмунча янгилик бўлар, аммо хоҳлайсизми, йўқми, ўзимизга маълум ёки номаълумми, барчамиз томонимиздан харид қилинадиган маҳсулотларнинг нархлари таркибида солиқлар бор.
Солиқларнинг миқдори ҳамда устамаларининг чекларда пайдо бўлиши маҳсулотлар нархларининг таркибидаги солиқларнинг намойиш этилишидан бошқа нарса эмас. Бу эса жуда ижобий ҳолат, деб ўйлайман.
Биз аввал ҳам ушбу ва бошқа шу каби солиқларни тўлаб келганмиз. Илк марта мазкур жараён шаффоф ва очиқ намоён этилмоқда, бу улкан тараққиёт.
Шахсан мен учун бу талваса ёки жазавага тушиш учун сабаб эмас, балки хушхабардир. Яна бир бор таъкидлайман, солиқ олишнинг янги тартиби жорий этилганига қарамасдан, чакана савдодаги нархлар ўзгаришсиз қолган.
Биз ҳар йили тармоғимизда «korzinka.uz» индексини ҳисоблаймиз. Бунинг учун биз тармоғимизда сотиладиган барча маҳсулотларнинг ўртача меъёрий нархини оламиз ва ўтган йилдаги нархи билан солиштирамиз. Шу тарзда мазкур нарх индекси ўтган йилда 11,4 фоизни ташкил қилди. Яъни, мамлакатдаги ўртача инфляция индексидан ҳам камроқ.
Бош вазир ўринбосарининг сўзларига кўра, давлат 17-18 фоиз атрофидаги нисбатан кўпроқ инфляцияни кутган экан. Лекин, айнан бозордаги рақобат ўсиши, хўжалик субъэктларининг конвертацияга бўлган талабининг бир хилда қондирилиши ва истеъмол бозорининг маҳсулотлар билан тўлдирилиши инфляцияни 15 фоиз атрофида ушлаб қолишга олиб келди.
Изоҳ (0)