Ўзбекистонда қишлоқ хўжалигида томчилатиб суғориш усулини қўллаш натижасида ҳосилдорлик қарийб уч баробарга ошди

Олий Мажлис Қонунчилик палатасининг Аграр ва сув хўжалиги масалалари қўмитасида қишлоқ хўжалиги вазири Баҳодир Юсуповнинг аграр соҳани ривожлантириш истиқболлари ва илм-фан талабларига мослаштиришнинг бугунги ҳолати тўғрисидаги ахбороти тингланди. Бу ҳақда ЎзА хабар берди.

Тадбирда фермер хўжаликлари, энг аввало, кўп тармоқли фермер хўжаликларини рағбатлантириш ва ривожлантириш, қишлоқ хўжалиги маҳсулотларини чуқур қайта ишлаш, озиқ-овқат маҳсулотларини ишлаб чиқариш бўйича замонавий технологик асбоб-ускуналар билан таъминлаш лойиҳалари ўз самарасини бераётгани таъкидланди.

Қишлоқ хўжалиги мамлакат иқтисодиётида, жумладан, аҳолини озиқ-овқат маҳсулотлари билан таъминлаш ва саноатнинг хом ашёга бўлган талабини қондиришда муҳим ўрин тутади. Ҳозирги кунда мазкур соҳанинг мамлакат ялпи ички маҳсулотидаги улуши 17 фоизни ташкил этиб, қишлоқ хўжалиги маҳсулотларининг барчаси нодавлат секторда етиштирилмоқда.

Вазирнинг маълумотига кўра, қишлоқ хўжалигини ислоҳ ва модернизация қилиш бўйича қабул қилинган дастурга мувофиқ 2016—2018 йилларда 240 минг гектар майдонда пахта ва бошоқли дон экишни қисқартириш ҳисобига экин майдонларини оптималлаштириш тадбирлари амалга оширилган.

Ушбу майдонларга жорий йилда юқори даромадли, экспортбоп экинлар, жумладан, 73,5 минг гектар сабзавот, 19 минг гектар картошка, 15,1 минг гектар полиз, 15,7 минг гектар соя, 3 минг гектар шоли, 44,3 минг гектар озуқа экинлар экилган ҳамда 23 минг гектар интенсив боғ, 8,3 минг гектар токзор ва 600 гектар замонавий иссиқхоналар барпо этилган.

2018 йилнинг ўзида республика бўйича 9,1 минг гектар интенсив боғ, 7,1 минг гектарда токзор барпо этилган, 4,9 гектар эски боғ ва 2,4 минг гектар токзорлар янгиланди.

Аграр соҳага янги инновацион технологияларни кенг жорий этиш масалаларига ҳам алоҳида эътибор қаратилмоқда. Масалан, Самарқанд вилояти Иштихон туманидаги «Иштихон нурли давр» фермер хўжалигида Исроил технологияси асосида томчилатиб суғориш усули қўлланилганда ёқилғи-мойлаш материаллари сарфи 54 фоизга камайган, ҳосилдорлик эса 45 центнерга ёки қарийб уч баробарга ошган.

Тасдиқланган ҳудудий дастурларга мувофиқ, жорий йилнинг 9 ойида мамлакат бўйича жами 21 364 та фермер хўжалигининг кўп тармоқли фаолиятини йўлга қўйиш мақсадида тегишли лойиҳалар амалга оширилиб, ушбу мақсадларга тижорат банклари томонидан 1,137 триллион сўмлик кредит ва лойиҳа иштирокчиларининг маблағлари сарфланган. Ушбу тадбирларни амалга ошириш натижасида 67 мингдан ортиқ янги иш ўринлари яратилган.

Вазирлар Маҳкамасининг 2018 йил 25 январдаги қарорига биноан, ҳудудларда 16 та пахта-тўқимачилик кластери ташкил қилиниб, уларга фермер хўжаликларининг қарийб 159 минг гектардан ортиқ экин майдонлари бириктирилди. 2019 йилда мамлакат бўйича 44 та пахта-тўқимачилик кластерлари ташкил этилиши ва уларга фермер хўжаликларининг 300 минг гектар ер майдони бириктирилиши режалаштирилган.

Якунда муҳокама этилган масала юзасидан келгусида қўмита ва Қишлоқ хўжалиги вазирлигининг ўзаро ҳамкорликда амалга оширилиши лозим бўлган вазифалари белгилаб олинди ҳамда қўмитанинг тегишли қарори қабул қилинди.