Тошкентдаги «Ёшлар ижод саройи»да Ўзбекистон ёшлар иттифоқи мукофоти танлови ғолибларини тақдирлаш маросими ўтказилди. Бу ҳақда «Дарё»га Ёшлар медиа маркази маълум қилди.
Танловда вазирлик, идора ва ташкилотлар томонидан давлат ва жамият бошқаруви соҳаси, иқтисодиёт ва қишлоқ хўжалиги соҳаси, фан-таълим ва ижтимоий соҳа, санъат, маданият, журналистика ва спорт соҳасидаги 17 та номинация бўйича 1109 нафар тавсия этилган номзод орасидан 49 нафар иқтидорли ёш қатнашди.
Ёшларга оид давлат сиёсати соҳасида «Йилнинг энг яхши Ўзбекистон ёшлар иттифоқи ходими» номинацияси бўйича Урганч туман «Камалак» болалар ташкилоти раиси Ҳамро Жуманиёзов, «Йилнинг энг фаол ҳуқуқ тарғиботчиси» номинациясида бўйича Фарғона вилояти адлия бошқармаси етакчи маслаҳатчиси Садриддин Эсоналиев, «Йилнинг энг яхши Ўзбекистон ёшлар иттифоқи маҳаллий кенгаши раиси» номинациясида эса Хўжайли туман кенгаши раиси Халила Халмуратов мукофотга лойиқ деб топилди.
Танловнинг иқтисодиёт ва қишлоқ хўжалиги соҳасида Суҳроббек Раҳимов, Акмал Оромов ва Барно Нарзуллаева муваффақият қозонди.
Фан-таълим ва ижтимоий соҳада Ўзбекистон ёшлар иттифоқи Тошкент шаҳар кенгаши робототехника тўгараги раҳбари Бунёдбек Зарипов, Тошкент молия институти муҳандиси Жасур Умурзоқов, Тошкент Давлат техника университети катта ўқитувчиси Бобуржон Зайниддинов, «Йилнинг энг яхши Ўзбекистон ёшлар иттифоқи бошланғич ташкилот етакчиси» номинацияси бўйича Абдулла Қорабоев, Шерзод Норматов, «Йилнинг энг яхши ’Камалак’ сардори» номинациясида Мадинабону Саиджонова энг муносиб деб эътироф этилди.
Санъат, маданият, журналистика ва спорт соҳасида Беҳруз Тоҳиров, Машҳурбек Раимжонов, Андижон вилоятидаги ихтисослаштирилган санъат мактаб-интернати ўқувчиси Дилҳавас Қодирова, «Ўзбекистон 24» телеканали мухбири Муслима Аманқулова, Ўзбекистон Миллий олимпия терма жамоаси аъзоси Розия Эргашева совриндор бўлди.
Танлов ғолиблари энг кам иш ҳақининг 30 баравари миқдоридаги пул мукофоти, статуэтка ҳамда қимматбаҳо совғалар билан тақдирланди.
Изоҳ (0)