Тошкентдаги Ёшлар ижод саройида «Ўзбекистон Ёшлар иттифоқи мукофоти» билан тақдирлаш маросими бўлиб ўтди. Мукофот давлат ва жамият бошқаруви, иқтисодиёт ва қишлоқ хўжалиги, фан-таълим, ижтимоий соҳа, санъат, маданият сингари 17 та номинация бўйича илғор ёшларга берилди ва ҳар бир ғолиб энг кам иш ҳақининг 30 баравари (6 081 900 сўм) миқдорида пул мукофоти билан рағбатлантирилди. Бу ҳақда «Халқ сўзи» хабар бермоқда.
Танлов ғолиблари овоз бериш орқали аниқланди. Унга кўра, «Йилнинг энг фаол ҳуқуқ тарғиботчиси» номинацияси бўйича Фарғона вилояти Адлия бошқармаси ижтимоий-иқтисодий соҳада ҳуқуқни қўллаш амалиёти ва ўрганиш бўлими етакчи маслаҳатчиси Садриддин Эсоналиев, «Йилнинг энг яхши ёш тадбиркори» номинациясида «Хоразмлик Раҳимовлар» оилавий корхона раҳбари Суҳроббек Раҳимов, «Йилнинг энг яхши ёш журналисти» номинациясида «Ўзбекистон 24» телеканали мухбири Муслима Аманқулова, «Йилнинг энг яхши ёш ижодкори» номинацияси бўйича Ўзбекистон бадиий академияси Андижон вилоятидаги ихтисослаштирилган санъат мактаб интернати ўқувчиси Дилҳавас Қодирова сингари фаол ёшлар ғолиб деб топилди.
Танловда имконияти чекланганига қармай, беш йилдан буён ҳунармандчилик билан шуғулланиб келаётган Барно Нарзуллаева «Йилнинг энг яхши ёш ҳунарманди» номинациясида мукофотга сазовор бўлди.
– Ўтган йили ушбу танловнинг тақдирлаш маросимини кузатиб, ҳавас қилган эдим. Бугун ўзим ҳам ғолиблар қаторидаман. – дейди Б. Нарзуллаева. – Мен бисердан турли уй жиҳозларига миллий безаклар бераман. Ишларимда юртимизнинг гўзал табиати, миллий қадриятларимизни акс эттиришга ҳаракат қиламан.
Изоҳ (0)