«Манчестер Юнайтед» клуб бош мураббийлигига 45 ёшли норвегиялик мутахассис Оле-Гуннар Сульшерни тайинлади. У жамоани мавсум охирига қадар бошқаради. Бу ҳақда клуб расмий сайтида хабар берилди.
Сульшер 1996—2007 йилларда «манкунианлар» сафида 366 та ўйинда майдонга тушиб, 126 та гол урган. У клуб билан 12 та совринни қўлга киритган, жумладан, Чемпионлар Лигаси ва 6 маротаба АПЛ чемпиони бўлган.
2008—2011 йиллар давомида Сульшер «Манчестер Юнайтед»нинг иккинчи жамоасига мураббийлик қилди, кейин Норвегиянинг «Молде» ҳамда Уэльснинг «Кардифф»да бош мураббий сифатида фаолият олиб борди.
Эслатиб ўтамиз, 18 декабрь куни «Қизил иблислар» Жозе Моуриньони истеъфога чиқарганди. Клуб 17-тур баҳсларидан сўнг Англия премьер лигасида 26 очко жамғариб, мусобақа жадвалида олтинчи ўринни эгаллаб турибди. Чемпионлар Лигасининг 1/8 финалида инглизлар ПСЖ билан ўйнайди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)