Ўзбекистоннинг Бенилюкс давлатларидаги элчиси Дилёр Ҳакимов KLM авиакомпаниясининг (Нидерландия) халқаро масалалар бўйича директори Ян Врибург билан учрашди. Бу ҳақда ТИВ матбуот хизмати хабар бермоқда.
Томонлар Ўзбекистон ва Нидерландия ўртасида ҳаво қатнови борасида алоқаларни йўлга қўйиш истиқболлари муҳокама қилинди.
KLM авиакомпанияси ўзбек томони билан Нидерландия аэропортлари, хусусан, Европадаги энг йирик аэропортлардан бўлган «Схипхол»ни Ўзбекистон орқали Марказий Осиёнинг бошқа давлатлари, Узоқ Шарқ минтақаси ва Ҳиндистон билан боғлайдиган янги йўналишларни ишлаб чиқишдан манфаатдор эканлигини билдирди.
Учрашувда Uzbekistan Airways Нидерландия расмийлари билан 2019—2020 йиллар қишки мавсумидан эътиборан парвозларни йўлга қўйиш бўйича музокаралар бошлаши мумкинлиги қайд этилди.
Томонлар KLMнинг шерик авиакомпаниялари, жумладан, етакчи халқаро лоукостерлардан фойдаланиб, Ўзбекистонга рейсларни йўлга қўйиш масалаларини ҳам муҳокама қилди. Бу Ўзбекистонга турлар нархи пасайиши ҳисобига мамлакатга келадиган европалик сайёҳлар ва тадбиркорлар сони кескин ортишига олиб келади.
Изоҳ (0)