Ўзбекистон Президенти Шавкат Мирзиёев Ўзбекистонда коррупцияга қарши кураш бўйича қўмиталар ташкил қилишни таклиф этди.
Президентга кўра, мамлакатда коррупциянинг олдини олиш ва унга қарши кескин курашиш борасида аниқ чоралар кўрилди. Мана шундай оғир жиноятни содир этган 1 минг 177 нафар мансабдор шахс жиноий жавобгарликка тортилди.
«Коррупцияга қарши курашда ҳуқуқни муҳофаза қилувчи идоралар қанчалик ҳаракат қилмасин, халқимиз бу жирканч иллатга муросасиз бўлмас экан, таъсирчан жамоатчилик назоратини ўрнатмас экан, бу балога қарши самарали курашни ташкил эта олмаймиз.
Бу иллат билан нафақат ҳуқуқни муҳофаза қилувчи идоралар, балки ҳар бир жамоа жиддий курашиши керак. Шунинг учун ҳар бир давлат идорасида жамоатчилик томонидан назорат қилинадиган коррупцияга қарши курашиш бўйича ўз ички дастурлари бўлиши шарт», — деди давлат раҳбари Конституция қабул қилинганининг 26 йиллигига бағишланган тантанали маросимдаги чиқишида.
АҚШ, Россия, Буюк Британия, Болгария, Греция, Латвия, Эстония каби кўплаб мамлакатларнинг парламентларида коррупцияга қарши курашиш бўйича комиссия ва қўмиталар мавжуд.
Шавкат Мирзиёев илғор хорижий тажрибалар ва Конституция талаблари асосида Олий Мажлис палаталарида Коррупцияга қарши курашиш бўйича қўмиталар ташкил қилишни таклиф этди. Ушбу қўмиталар барча бўғиндаги давлат идораларида коррупцияга қарши курашни янада кучайтиришга вакиллик органи сифатида муносиб ҳисса қўшиши лозим.
Изоҳ (0)