Тбилисидаги норозилик митингида мухолифат муддатдан олдин парламент сайловларини талаб қилди

Тбилисининг Руставели проспектида минглаб одамлар норозилик митингига тўпланди. Бу ҳақда «Интерфакс» хабар берди.

Норозилик президент сайлови натижаларини тан олишдан бош тортган «Куч бирликда» мухолифат бирлашмаси вакиллари томонидан ташкиллаштирилди.

«Ягона миллий ҳаракат» мухолифат партияси томонидан президентликка номзоди илгари сурилган, собиқ-президент Михаил Саакашвилининг сафдоши Григол Вашадзенинг журналистларга маълум қилишича, митинг иштирокчиларининг ҳукуматга асосий талаби муддатидан аввал парламент сайловларини ўтказишдир.«Ягона миллий ҳаракат» мухолифат партияси Саломе Зурабишвилини ўз президенти деб тан олмайди.28 ноябрь куни ўтказилган сайлов натижасига кўра, президент сайловининг иккинчи даврасида «Грузия орзуси» партиясидан кўрсатилган мустақил номзод Саломе Зурабишвили ғалаба қозонди.Грузия МСК томонидан эълон қилинган натижаларга кўра, Зурабишвили сайловчиларнинг 59,52% (1 147 627 овоз) овозини тўплаган, унинг «Ягона миллий ҳаракати» мухолифат партиясидан қўйилган рақиби Вашадзе эса 40,48% (780 633 овоз).Президент сайловининг иккинчи давра сайловларида сайловчиларнинг 56,23% иштирок этган.Сайланган президентнинг инаугурация маросими Грузия Конституциясига кўра 16 декабрь куни бўлиб ўтади.