30 ноябрь куни «Ўзекспомарказ» павильонида Ахборот технологиялари ва коммуникацияларини ривожлантириш вазирлиги ва «Ўзбектелеком» АК томонидан ташкил этилган «Ўзбекистон Республикаси Президенти топшириғи бўйича АКТ соҳасида топшириқларни амалга ошириш кетма-кетлиги» ҳисобот анжумани бўлиб ўтди. Бу ҳақда «Дарё» мухбири Севара Нишонова хабар берди.
Матбуот анжуманида таъкидланишича, 2018 йил 1 декабрдан бошлаб «Ўзбектелеком» янги кафолатланган чексиз тариф режаларини тақдим этади.
Ўзбекистонда биринчи марта 2 Мбит/с тезликка эга кафолатланган чексиз интернет нархи ойига 88 минг сўмни ташкил этади.
Бу олдинги шундай тариф режасидан 2 мартадан кўпроқ қийматда арзонроқ экани айтилмоқда.
Бундан ташқари, энди тариф режаларида «гача« қўшимчаси мавжуд бўлмайди. Бу танлаб олинган тезликнинг кафолатланишини англатади. Энди 1 Мбит/с тариф айнан 1 Мбит/с барқарор тезликка тенг бўлади.
«Фаол тадбиркорлик, инновацион ғоялар ва технологиялар йили»да «Ўзбектелеком» ҳам кичик ва ўрта бизнес субъектларини қўллаб-қувватлайди. 1 декабрдан компания абонентларга «Тезнет Business» ва «Тадбиркор» янги тариф режалари серияларини тақдим этади.
Шунингдек, 2019 йилдан бошлаб «Ўзбектелеком» АК ADSL тармоғини ривожлантиришни тўхтатади ва FTTx технологияси бўйича Тармоқни ривожлантириш учун барча кучларни йўналтиради. Компания режаларида абонентларни FTTx технологияси бўйича босқичма-босқич улаш ва ҳар бир фойдаланувчига юқори сифатли интернет хизматларини тақдим этиш белгиланган.
Изоҳ (0)