24 ноябрь, шанба куни Жисмоний тарбия ва спорт вазирлигида Хорижий мутахассислар билан меҳнат шартномалари (контрактлар) тузиш тўғрисида иш берувчининг таклифларини кўриб чиқиш бўйича Эксперт комиссиясинин йиғилиши бўлиб ўтди. Бу ҳақда Жисмоний тарбия ва спорт вазирлиги матбуот хизмати «Дарё»га хабар берди.
Йиғилишнинг кун тартибидаги масала сифатида оғир атлетика, спорт курашлари, таэквондо WTF ва гимнастика спорт турлари бўйича федерация (ассоциация)лар томонидан таклиф қилинаётган хорижлик тренер номзодлар билан шартномалар тузиш масаласи муҳокама қилинди.
«Хорижлик мураббийларни жалб этишда айрим спорт турлари билангина чекланиб қолмаслигимиз лозим. Айниқса, малакали мутахассислар танқис ва етарли натижаларга эришилмаётган спорт турлари бўйича малакали хорижлик мутахассисларни жалб этишимиз керак бўлади. Янги шартнома тузилаётган хорижий мутахассислар тажрибасидан 2020 йил Токио шаҳрида бўлиб ўтадиган 32-ёзги Олимпия ўйинларига муносиб спортчиларни тайёрлаш борасида унумли фойдаланиш зарур» – деди Жисмоний тарбия ва спорт вазири Дилмурод Набиев.
Йиғилиш якунида юнон-рум кураши бўйича грузиялик тренер Заза Силагадзе, гимнастика бўйича россиялик тренер Екатерина Пирожкова ва оғир атлетика бўйича туркманистонлик тренер Artур Эмирян билан шартнома тузиш борасида қарор қабул қилинди.
Изоҳ (0)