«Дарё» таҳририятига Самарқанд шаҳридаги Сиёб деҳқон бозорида савдо қилувчи тадбиркор Элмурод Мардиев мурожат қилиб, деҳқон бозоридаги айрим тартибсизликлар унинг тадбиркорлик ишига ҳалал бераётганлигини баён қилган. Мазкур масала юзасидан «Дарё» мухбири Фарҳод Норбўтаев журналистик суриштирув ўтказди.
«2015 йилдан буён Сиёб деҳқон бозорида тадбиркорлик фаолиятини юритиб, бозорда парранда маҳсулотлари савдоси билан шуғулланаман. Давлат томонидан талаб қилинган барча тўловларни ўз вақтида амалга ошираман. Бироқ, бозор ҳудудига кириш қисмида турли хил буткачаларнинг ташкил этилиши, бозор ичида савдо қилувчи мен каби тадбиркорларнинг савдосига таъсир қиляпти», — дейди Элмурод Мардиев.
Сиёб бозори ҳудудига кириш дарвозаси олдида бешдан ортиқ савдо буткачалари ташкил қилинган. Мазкур кўчма савдо дўконлари Ўзбекистон Республикаси Вазирлар Маҳкамасининг 2016 йил 13 июлдаги «Кўчма савдога рухсат бериш тартиби тўғрисидаги Низомни тасдиқлаш ҳақида»ги 233-сонли ва Самарқанд вилоят ҳокимининг 2016 йил 16 июлдаги 205-Қ сонли ҳамда Самарқанд шаҳар ҳокимининг 2016 йил 21 июлдаги 1048-Қ сонли қарорига мувофиқ 2018 йилда кўчма савдо объектларини жойлашиш схемаси тасдиқланган.
Ўрганишлар давомида фақатгина якка тартибдаги тадбиркор Озод Шарофов ва Баҳодир Сориевга Сиёб бозори ёнидан ўтувчи Ал-Бухорий кўчасидан Сиёб бозори ҳудудида кўчма савдо дўконида савдо қилишга рухсат берилган. Қолган тадбиркорларнинг гувоҳномаларида савдо қилиш манзили кўрсатилмаган.
Мазкур масала юзасида Сиёб деҳқон бозори раҳбари Солижон Ўсаров билан ҳам суҳбатлашдик.
«Бозорнинг кириш қисмида кўчма дўконда савдо қилиш учун якка тартибдаги тадбиркорларга Самарқанд шаҳар ҳокимининг иқтисодиёт ва тадбиркорлик масалалари бўйича ўринбосари Талантжон Эсиргапов имзо чеккан гувоҳнома бор. Бу тадбиркорларга бозорнинг кириш қисмида савдо қилмасликни айтсак, улар дарров ҳокимият берган гуоҳномасини кўрсатишади. Ҳокимият бозор олдида кўчма дўконда савдо қилиш учун рухсат берган, бироқ, Сиёб бозори маъмуриятида бу борада ҳеч қандай ҳужжат йўқ. Аниқроғи, бозорнинг кириш қисмида кўчма дўкон бўйича бозор маъмуриятининг розилиги сўралмайди. Тадбиркорлар ҳокимият берган гувоҳнома асосида ўз буткаларини жойлаштириб олган. Биз ҳам бозор худуди тартибли бўлишини истаймиз. Аммо ҳокимият қарор чиқарганидан сўнг биз ҳеч қандай чора кўролмаймиз. Бирор бир чора кўрса дарров тадбиркорлик фаолиятига тўсқинлик қилган бўламиз», - дейди Солижон Ўсаров.
Кўчма дўконда савдо қилувчи ходимлар билан суҳбат жараёнида аниқланишича, якка тартибаги тадбиркор сотувчи сифатида одамларни ёллаб савдо фаолияти билан шуғулланилаётганлиги аниқланди. Биз кўчма савдо дўконинг бирорта ходимини топа олмадик. Сотувчилар ҳозир келади, иш билан чиқиб кетган деган гапдан нарига ўтмади. Амалдаги қонунлар бўйича якка тартибдаги тадбиркор савдо дўконида фаолиятни ўзи юритиш керак эмасми? Агар ишчи ходим олиб фаолият юритаётган бўлса тадбиркорлик фалолияти давлат рўйхатидан бошқа тартибда ўтказилиши керак эмасми? Наҳотки вилоят Давлат солиқ бошқармаси бундай ҳолатларга кўз юмаётган бўлса? Солиқни камроқ тўлаш мақсадида якка тартибдаги тадбиркор сифатида рўйхатдан ўтиб, ишни истаганча юритиш мумкинми?
Кўчма савдо дўконларига чиқарилган гувоҳномалардаги имзонинг турли хил эканлиги ҳам эътиборимизни тортди. Буни гувоҳномадаги имзолардан ҳам кўришингиз мумкин.
Аслида кўчма савдо дўконлари бозор худудидан узоқда, аҳоли бозорга келиш имконияти кам бўлган жойларга қўйилса мақсадга мувофиқ бўлмайдими?
Қолаверса, бозор худудида тозалик ва тартиб бўлишини талаб қилган ҳокимликнинг ўзи ҳудудга киришда кўчма дўконларнинг фаолиятига рухсат бериш орқали ўз талабини ўзи бузиб чиққан бўлмаяптими?
«Тадбиркорларнинг барчаси тенг кўрилиши керак. Кимларнингдир кўмагида бозорнинг кириш қисмида савдо қилиш имкониятини яратилиши бошқа тадбиркорларнинг манфаатига зид бўлиши керак эмас. Бизда ҳам зарур ҳужжатлар бор. Нега бизга бозорнинг кириш қисмига савдо қилишга рухсат беришмаётганлигига тушуниш қийин», — дейди Элмурод Мардиев.
Биз мазкур ҳолат юзасидан Самарқанд шаҳар ҳокимлигининг муносабатини кутиб қоламиз.
Изоҳ (0)