Инсон ҳуқуқлари умумжаҳон декларацияси қабул қилинганининг 70 йиллиги муносабати билан жорий йилнинг 22—23 ноябрь кунлари Самарқанд шаҳрида Инсон ҳуқуқлари бўйича Осиё форуми бўлиб ўтади, деб ёзади ЎзА.
Инсон ҳуқуқлари бўйича Ўзбекистон Республикаси Миллий маркази ва Халқаро пресс-клуб томонидан ушбу йирик форум олдидан брифинг ташкил этилди.
Унда Инсон ҳуқуқлари бўйича Ўзбекистон Республикаси Миллий маркази директори Акмал Саидов, БМТ Бош котиби ўринбосари Михаэл Мёллер, БМТнинг Ўзбекистондаги доимий мувофиқлаштирувчиси, БМТ Тараққиёт дастурининг доимий вакили Ҳелена Фрейзер, БМТнинг Инсон ҳуқуқлари бўйича Олий комиссарлиги бошқармасининг Марказий Осиё бўйича минтақавий вакили Ришард Коменда, ЕХҲТ демократик институтлар ва инсон ҳуқуқлари бюросининг демократлаштириш масалалари бўйича департаменти раҳбари Марчин Валески иштирок этди.
Нуфузли тадбирда БМТ, ЕХҲТ, ИҲТ каби халқаро ва минтақавий ташкилотлар раҳбарлари, хорижий мамлакатлар парламентлари аъзолари, инсон ҳуқуқлари бўйича миллий институтлар ва нодавлат нотижорат ташкилотлари фаоллари, экспертлар иштирок этади. Форум ишини маҳаллий ва хорижлик журналистлар ёритиб боради.
Форум сессиялари «Инсон ҳуқуқлари умумжаҳон декларацияси мероси — универсаллик ва инсон ҳуқуқлари», «Инсон ҳуқуқлари — Барқарор ривожланиш мақсадларини таъминлаш асоси сифатида», «Инсон ҳуқуқлари соҳаси таълими: инновациялар ва янги даъватлар», «Инсон ҳуқуқлари бўйича миллий институтларнинг инсон ҳуқуқлари ҳурмат қилиниши, ҳимоя этилиши ҳамда уларга риоя қилинишини таъминлаш масалаларида давлат органлари ва фуқаролик жамияти институтлари билан ўзаро ҳамкорлиги» деб аталган бўлиб, уларда муайян мавзулар бўйича мулоқот олиб борилади.
Форум ишида инсон ҳуқуқларини ҳимоя қилиш бўйича мавжуд механизмларни янада такомиллаштириш ва янгиларини таъсис этиш, инсон ҳуқуқлари бўйича миллий институтлар ўртасида ўзаро ҳамкорликни таъминлаш юзасидан амалий тавсиялар ишлаб чиқиш режалаштирилган.
Инсон ҳуқуқлари бўйича Самарқанд декларацияси қабул қилиниши кутилмоқда. Ушбу якуний ҳужжат Инсон ҳуқуқлари умумжаҳон декларацияси ва Барқарор ривожланиш мақсадларида белгиланган вазифаларни янада самарали бажаришга хизмат қилади.
Изоҳ (0)