Қирғизистонлик ишлаб чиқувчиларнинг Марказий Осиё ҳақидаги таҳлилий материалларни тақдим этувчи «Kaktakto.com» сайтида Ўзбекистон автосаноатидаги янги брендларга бағишланган мақола эълон қилинди.
Ўзбекистонда ишлаб чиқариладиган машиналар автопарки яқин йиллар ичида сезиларли равишда янгиланади, кенгаяди ва янада хилма-хиллашади. Сўнгги бир ярим йил ичида бир йўла бир нечта Европа ва Осиё компаниялари кичик тоннажли юк машиналари ва микроавтобуслардан тортиб, бақувват самосваллар, шатакчилар ва шаҳар автобусларигача бўлган автомашиналар ишлаб чиқаришни йўлга қўйиш учун Ўзбекистон бозорига келди, дейилади хабарда.
Kaktakto Ўзбекистонда автосаноати яқин вақтлар ичида қандай брендлар билан тўлишига аниқлик киритди.Hyundai
Яқинда Наманган вилоятининг Тўрақўрғон туманида Hyundai автомобиль заводига тамал тоши қўйилди. Жанубий Кореянинг Hyundai Motor, Evergreen Motors ва Posco-Daewoo cорпоратион компаниялари ҳамкорлигида қурилиши режалаштирилган завод 2019 йилнинг сентябрида илк маҳсулотларини чиқаришни бошлайди.
Заводда бошланишига йилига 1000 та автомобиль ишлаб чиқарилади. Уч йил ичида бу кўрсаткич 3 баробар кўпаяди, яъни йилига 1000 та автобус ва 2000 та юк машинаси ишлаб чиқарилади. Маҳаллийлаштириш дастури асосида 50 фоиз эҳтиёт қисм шу ернинг ўзида тайёрланиши кўзда тутилган. 1000 дан ортиқ иш ўрни яратилади.КамАЗ
27 март куни «Ўзекспомарказ» миллий кўргазмалар мажмуасида Шавкат Мирзиёевнинг 2017 йил 4—5 апрель кунлари Россияга ташрифи чоғида Ўзбекистонда йиғилиши келишиб олинган «КамАЗ» юк машиналарининг тақдимот маросими бўлиб ўтди.
«КамАЗ» автомобилларини ишлаб чиқариш Самарқанд вилоятининг Жомбой туманида жойлашган UzAutoTrailer масъулияти чекланган жамиятнинг ишлаб чиқариш майдонида бошланган.
Ҳозирги кунда Ўзбекистонда 10 тоннадан 36 тоннагача юк таший оладиган 11 турдаги «КамАЗ» моделлари бор. Уларнинг двигатели қуввати 240-401 от кучига эга ва экологик талабларга жавоб беради.
Завод йилига 1,5 мингта юк машинасини ишлаб чиқаради. Компания ишлаб чиқариш қувватини 5 мингтага етказмоқчи. Бундан ташқари Ўзбекистонда ишлаб чиқарилган юк машиналарини Марказий Осиё, Яқин Шарқ ва Африка мамлакатларига ҳам экспорт қилиш мўлжалланмоқда.
Шунингдек, «КамАЗ» компанияси билан ҳамкорликда Ўзбекистоннинг 12 та вилоятида дилерлик ва сервис ташкилотларини ташкил этиш режалаштирилмоқда.Peugeot Citroen
2017 йил июль ойида тамал тоши қўйилган Uzbekistan Peugeot Citroen Automotive заводида йилига 16 минг Peugeot Expert ва Peugeot Boxer русумидаги тижорат автомобиллари ишлаб чиқариш кўзда тутилган.
Корхонанинг қурилиш-монтаж ишлари жорий йил май ойига қадар амалга оширилади, 2019 йилда маҳсулот ишлаб чиқаришни бошлайди.
Завод Ўзбекистон Республикаси Президентининг 2017 йил 13 июндаги «Хорижий инвестициялар иштирокидаги Uzbekistan Peugeot Citroen Automotive корхонасини ташкил этиш тўғрисида»ги қарорига мувофиқ, «Ўзавтосаноат» АК ва Peugeot Citroen Automotive гуруҳи ўртасидаги келишув асосида қурилмоқда.Volkswagen
2017 йил охирида Ўзбекистон ҳукуматининг бош вазир Абдулла Арипов бошчилигидаги делегациясининг Германияга расмий сафари ҳамда Ўзбекистон – Германия бизнес-форуми доирасида «Ўзавтосаноат» АЖ ва Volkswagen AG концерни ўртасида JV MAN Auto-Uzbekistan майдонларида Volkswagen Amarok пикапини ишлаб чиқариш бўйича келишув имзоланди
Лойиҳа 2018–2019 йилларда амалга оширилиши режалаштирилмоқда.Foton Motor
Апрель ойида Намангандаги «Фотон дўстлик сервис» МЧЖ Хитойнинг Foton Motor ширкати билан ҳамкорликда Наманган вилоятининг Поп шаҳрида FOTON русумли ўрта ҳажмли Хитой юк автомобиллари ишлаб чиқариш лойиҳасини бошлади.
Умумий лойиҳа қиймати 25 миллион АҚШ доллари бўлган бу заводни жойлаштириш учун 15 гектар майдон ва бўш турган эски завод биноси нол қийматда тақдим этилди. Ўзбекистон Республикасининг сармояси 51%, хитойлик ҳамкорларнинг ҳиссаси эса 49 % га тенг бўлган бу завод йиллик 15 минг дона Foton Forland ўрта ҳажмли юк автомобиллари ишлаб чиқаради.
«Фотон дўстлик сервис» МЧЖ бу заводда ишлаб чиқарилиши режалаштирилган 4 та русумдаги автомобилни тўла ишлаб чиқариш ҳуқуқини қўлга киритди.
Изоҳ (0)