Бош прокуратура ҳузуридаги Agrosаноат мажмуи ва озиқ-овқат ҳавфсизлиги таъминланиши устидан назорат қилиш инспекциясининг Самарқанд вилоят бошқармаси томонидан Ўзбекистон Республикаси Вазирлар Маҳкамасининг 2018 йил 30 сентябрдаги «2019 йил ҳосили учун кузги бошоқли дон экинлари навларини жойлаштириш ва бошоқли дон етиштиришнинг прогноз ҳажмлари тўғрисида»ги қарори ижроси юзасидан Самарқанд вилоятида мунтазам назорат тадбирлари ўтказилмоқда. Бу ҳақида «Дарё» мухбири Фарҳод Норбўтаев хабар бермоқда.
Ўтказилган мониторинг натижаларига кўра аниқланган қонунбузилиш ҳолатлари юзасидан икки нафар масъул шахс огоҳлантирилиб, бир нафар шахс интизомий, 33 нафар шахс маъмурий жавобгарликка тортилган.
Хусусан, Нарпай туман ирригация бўлими муҳандис-гидротехниги Э.Жўрақулов ўз вазифасига совуққонлик билан қараган ҳолда ўзига бириктирилган «Машина» каналидаги тақсимот ҳисобини тўғри юритмаганлиги аниқланган. Э.Жўрақулов ғалла экинларини суғориш учун ажратилган сувни назоратсиз қолдирганлиги сабабли унга нисбатан интизомий чора қўлланилган.
Ургут тумани ирригация бўлимига қарашли «Наврўз» канали бошлиғи Ш.Халилов каналнинг сув ўлчагичи ускунаси йўқлиги сабабли ғалла майдонларини суғориш учун ажратилган сувни белгиланган миқдорда бермаганлиги учун Ўзбекистон Республикаси МЖтКнинг 76-моддаси 2-қисми билан маъмурий жазо чораси қўлланилган. «Янги Ургут» канали назоратчиси Б.Шералиевга нисбатан сувни белгиланган меъёрдан кам миқдорда берганлиги сабабли маъмурий жазо чораси қўлланилган.
Самарқанд туманидаги «Зоҳидов Ҳаким неъматлари» фермер хўжалиги раиси С.Зоҳидов, «Оҳалик сут маҳсулотлари» фермер хўжалиги раиси Б.Бекчанов, «Сардорбек агро саҳоват» фермер хўжалиги раиси С.Зокировлар ғаллани суғоришда эътиборсизлик қилганлиги, ғалла майдонлари ҳудудидаги ички ариқлар тозаланмаганлиги сабабли сув исрофгарчилигига йўл қўйган. Уларга нисбатан Ўзбекистон Республикаси МЖтКнинг тегишли моддаларига асосан маъмурий жазо чораси қўлланилди.
2019 йил ҳосили учун 9 597 та фермер хўжалигининг 103 930 гектар суғориладиган майдонларига экилган ғалла парваришида агротехник тадбирларга қатъий амал қилиш, суғоришда сувдан оқилона фойдаланиш, дала бошига маҳаллий ўғит чиқариш, минерал ўғитлар билан озиқлантириш сингари масалаларга алоҳида эътибор қаратилмоқда.
Изоҳ (0)