Самарқанд вилояти ИИБ ЙҲХБ ходимлари томонидан йўл-транспорт ҳодисаларини олдини олиш, ҳаракат хавфсизлигини таъминлаш мақсадида «Йўл ҳаракати хавфсизлиги тарғибот куни» тадбири ўтказилди. Бу ҳақда «Дарё» мухбири Фарҳод Норбўтаев хабар бермоқда.
Ўтказилган рейдлар мобайнида ҳайдовчилар томонидан жами 1563 та қоидабузарликлар қайд қилинган. Шундан 572 та қўпол қоидабузарликлар, 147 та транспорт воситасини маст ҳолда бошқариш, 84 та светофор ва чорраҳалардан ўтиш қоидасини бузиш, 10 та транспорт воситаси бошқариш вақтида телефондан фойдаланиш, 427 та хавфсизлик камаридан фойдаланмаслик, 91 та пиёдалар томонидан содир этилган қоидабузарликлар аниқланиб, қонуний чоралар қўлланилди.
Тарғибот куни давомида қўпол қоидабузарликлар, хусусан маст ҳолда ва бошқа транспорт воситасини бошқариш ҳуқуқидан маҳрум этиш жазоси назарда тутилган қоидабузарликлар, транспорт билан боғлиқ жиноятлар ҳамда ўлим билан боғлиқ йўл транспорт ҳодисалари содир этган ҳайдовчиларни яшаш жойларида ҳудудий суд идоралари билан 17 та сайёр суд мажлислари ўтказилди.
Жумладан, вилоят ИИБ ЙҲХБ маъмурий биносида спиртли ичимлик истеъмол қилган ҳайдовчиларга нисбатан Самарқанд шаҳар Маъмурий суди томонидан ўтказилган сайёр судда тегишли чоралар қўлланилди. Аммо Самарқанд ва Пастдарғом туманларида ҳудудий суд идоралари билан ҳамкорликда сайёр суд мажлислари ўтказилмаган.
Мутасади идоралар билан ҳамкорликда 44,5 километр пиёдалар йўлаклари ва болалар ҳаракати серқатнов бўлган йўллар кўрикдан ўтказилиб, 23 километри таъмирланди ҳамда 34 дона йўл белгилари ўрнатилди. 44 донаси алмаштирилди ва аниқланган камчиликлар юзасидан 12 та йўл ташкилотларига, 8 та ҳудудий ҳокимликларга тақдимномалар киритилди.
Бир кунлик тадбир мобайнида жами 947 маротаба, шундан 89 маротаба меҳнат жамоаларида, 324 маротаба маҳаллаларда, 263 маротаба таълим муассасаларида, 112 маротаба аҳоли гавжум жойларда, 44 маротаба йўловчи ташиш фаолияти билан шуғулланувчи уюшмаларда, 115 маротаба бошқа идора ва ташкилотларда профилактик суҳбатлар ўтказилган.
Самарқанд вилояти ИИБ ЙҲХБ матбуот хизматининг маълум қилишича, бир кунлик тарғибот кунида 1137 нафар ички ишлар ходими жалб қилинган. Шундан 317 нафар Давлат йўл ҳаракати хавфсизлиги хизмати, 453 нафар Ҳуқуқбузарликлар профилактикаси хизмати, 61 нафар ППХ ва ЖTCБ ходимлари, 95 нафар Ёнғин хавфсизлиги хизмати, 105 нафар Қўриқлаш хизмати ва 106 нафар бошқа соҳавий хизматлар ходимлари ҳамда 1385 нафар ҳокимликлар, идора ва ташкилотлардан жамоатчилик вакиллари иштирок этган.
Изоҳ (0)