Фарғона вилоятида ЙҲХБ ходимига 400 минг сўм пора таклиф қилган 2 нафар фуқаро ушланди, деб хабар берди «Дарё» мухбири Азизжон Эрматов.
Вилоят ИИБ матбуот хизматидан олинган маълумотга кўра, Қўқон—Андижон йўлининг Ёзёвон туманидан ўтувчи қисмида хизмат вазифасини бажараётган ЙҲХБ ходими «ГАЗ-24» русумли автомашинани тўхтатган. Текширув жараёнида автомашина ҳайдовчиси Андижон шаҳрида яшовчи М.А. лицензиясиз аҳолига пуллик автомобиль хизмати кўрсатгани аниқланган. Бу ҳақида маъмурий баённома расмийлаштирилиб, автомашина жарима майдончасига жойлаштирилган.
Орадан бир кун ўтиб, ҳайдовчи М.А. таниши Ш.Т. билан ўзига нисбатан расмийлаштирилган маъмурий баённомага мувофиқ чора кўрмаслик ва жарима майдончасидаги автомашинасини чиқариб беришини сўраб, ИИБ ходимига 400 минг сўм пулни пора сифатида таклиф қилган.
ЙҲХБ инспектори бу ҳақида ўз хавфсизлик бўлимига ариза билан мурожаат қилган. Ушбу ҳолат юзасидан вилоят ИИБ ходимлари томонидан ўтказилган тезкор тадбир давомида фуқаро Ш.Т. ЙҲХБ инспекторига 400 минг сўм пулни пора сифатида берган вақтида ушланган.
Ҳозирда ҳолат юзасидан суриштирув ишлари олиб борилмоқда.
Изоҳ (0)