Ижтимоий тармоқларда пойтахтдаги «Малика» савдо мажмуасида жорий йил 13 ноябрь куни Давлат солиқ қўмитаси томонидан ташкил этилган назорат тадбири тафсилотлари турлича талқин қилинмоқда. Бу ҳақда «Дарё»га қўмита жамоатчилик билан алоқалар ва ҳуқуқий ахборот бўлими маълум қилди.
Хусусан, «тадбиркорларнинг 80 фоиз дўконлари ёпиб қўйилди», «энди бундан буён текшир-текшир бошланди» ёки «товарлар ҳеч қандай ҳужжатлар расмийлаштирилмасдан олиб қўйилди ва эртага қайтарилмайди» каби мазмундаги нотўғри фикр-мулоҳазалар билдирилмоқда.
Давлат солиқ қўмитаси бунга қуйидагича изоҳ билдирди.
«Малика» савдо мажмуасида жами 205 та савдо дўкони мавжуд бўлиб, 2018 йил 15 ноябрь куни уларнинг 80 фоиздан ортиғи, яъни барча ҳужжатларга эга, қонуний йўл билан ишлаётган савдо дўконлари ўз фаолиятини одатдагидек давом эттирмоқда.
Назорат тадбирида 205 та дўкондан 13 тасида тадбиркорлик гувоҳномаси бўлмаган шахслар савдо билан шуғулланаётганлиги аниқланди. Уларга тегишли бўлган ҳеч қандай ҳужжат ва сифат сертификатисиз, умумий қиймати қарийб 308 миллион сўмлик маиший техника воситалари, уяли алоқа телефонлари ва аксессуарлар масала қонуний ҳал бўлгунига қадар вақтинчалик олиб қўйилди.
Назорат тадбири давомида ҳужжатсиз сотилаётган товарларни вақтинча олиш юзасидан барча зарур ҳужжатлар расмийлаштирилди. Жумладан, товарни олиш далолатномаси (унда аниқ рўйхат келтирилган), унинг нусхаси ҳуқуқбузарларга тақдим этилган.
Савдодан олинган товарлар сақлаш учун махсус дўконларга топширилиб, уларнинг бутлигини таъминлаш бўйича аниқ масъул шахсларга жавобгарлик юклатилди. Ушбу ҳуқуқбузарлар камчиликларни бартараф этса, яъни 1 ой муддат давомида ўз фаолиятини қонуний асосда йўлга қўйса, улар учун ҳеч қандай жарималар қўлланилмаган ҳолда, олиб қўйилган товарлари қайтариб берилиши суд орқали ҳал этилади.
Давлат солиқ қўмитаси ўз фаолиятини қонун доирасида олиб бораётган ва солиқларни ўз вақтида тўлаб келаётган тадбиркорларга ҳеч қандай тўсиқ бўлмаслигини, фаолияти текширилмаслигини яна бир бор эслатиб ўтди.
Изоҳ (0)