Чирчиқ олий танк қўмондонлик-муҳандислик билим юртида ушбу ҳарбий таълим муассасаси ташкил топган сана нишонланди. Бу ҳақда Мудофаа вазирлиги матбуот хизмати «Дарё»га маълум қилди.
Унда Мудофаа вазирлиги раҳбарияти, жамоат ташкилотлари ҳамда ушбу билим юрти билан мунтазам ҳамкорликда ишлайдиган муассасалар вакиллари, ота-оналар, курсантлар ҳамда собиқ битирувчилар иштирок этди.
Тадбир давомида мудофаа вазирининг билим юрти шахсий таркибини тақдирлаш тўғрисидаги буйруғи ўқиб эшиттирилди. Унга асосан бир гуруҳ билим юрти шахсий таркиби муносиб рағбатлантирилди.
Сўзга чиққанлар Чирчиқ олий танк қўмондонлик-муҳандислик билим юртининг мамлакат олий ҳарбий таълим муассасалари орасида тутган ўрни, эришилган муваффақиятларни эътироф этиб, қутлуғ сана билан йиғилганларни табриклади.
Бугунги кунда Чирчиқ олий танк қўмондонлик-муҳандислик билим юртида «Танк қўшинлари тактик қўмондонлиги», «Ҳаво-десант қўшинлари тактик қўмондонлиги», «Терроризмга қарши кураш бўлинмалари тактик қўмондонлиги», «Maxсус операция кучлари бўлинмалари тактик қўмондонлиги», «Зенит-ракета қўшинлари тактик қўмондонлиги», «Танк қўшинлари тактик муҳандислиги» каби йўналишлар бўйича офицер кадрлар тайёрланади. Олиб борилган изчил саъй-ҳаракатлар самараси натижасида ушбу олий ҳарбий таълим муассасаси 2012—2013-ўқув йили якуни бўйича «Энг илғор олий ҳарбий таълим муассасаси» кўрик-танловининг ғолиби деб топилган.
Чирчиқ олий танк қўмондонлик-муҳандислик билим юртининг ўнлаб офицерлари, Қуролли Кучлар хизматчилари ҳамда профессор-ўқитувчилари Президент фармонига биноан юксак давлат мукофотлари билан тақдирланган.
Тантанали тадбир давомида Қуролли Кучлар Марказий ашула ва рақс ансамбли хонандалари ўзларининг чиқишлари билан барчага байрам кайфиятини улашган бўлса, билим юрти курсантларининг кўргазмали чиқишлари меҳмонлар олқишига сазовор бўлди.
Изоҳ (0)