16 ноябрь куни вояга етмаганлар комиссияси томонидан Тошкент шаҳрининг Учтепа туманида жойлашган 236-сонли умумий ўрта таълим мактабининг 11-синф ўқувчилари ўқитувчисини калтаклаши ишини кўриб чиқди. Бу ҳақда «Kun.uz» хабар бермоқда.

Ҳодиса 27 октябрь куни содир бўлган. Мактабдаги тарих ўқитувчиси Ўзбекистон давлат мадҳияси янграётган вақтда ўқувчилар ҳурматсизлик қилиб, мадҳияни мазах қилишганида, ўқитувчи уларга танбеҳ бериб, уларни тартибга чақирган. Шундан кейин 14 нафар ўқувчи бир бўлиб, ўқитувчини дўппослай бошлаган, ўқитувчи жиддий тан жароҳати билан шифохонага ётқизилган.

Комиссия аъзолари 14 ўқувчининг барчасини вояга етмаган болалар учун махсус колонияга жўнатиш таклифини билдиришган. Лекин қонунчиликка кўра, вояга етмаган болаларни дастлаб махсус ҳисобга олмасдан туриб, колонияга жўнатиб бўлмайди.

«Қонунчиликка кўра, бир ҳуқуқбузарлик учун бир чора кўрилади. Бу вазият учун 3 та жазо тури бор бўлиб, шундан биттасини танлаш мумкин эди: ота-онасига жарима қўллаш, махсус ҳисобга олиш ва махсус колонияга жўнатиш. Maxсус колонияга жўнатиш учун болалар аввал махсус ҳисобга олинган бўлиши керак эди.

Биз жарима жазосини жуда енгил жазо деб топдик. Шунинг учун, уларга нисбатан махсус ҳисоб олиш жазоси берилди. Улар бундан кейин ички ишлар ходимлари назорати остида бўлишади», — деди комиссия аъзоларидан бири.