Халқаро футбол уюшмаси — ФИФАнинг Ўзбекистон Суперлигасида иштирок этаётган Тошкентнинг «Бунёдкор» футбол клубидан 6 очко олиб ташлаш борасидаги талаби қондириладиган бўлди. Бу ҳақда ЎФА матбуот хизмати хабар берди.
ЎФА сентябрь ойида юборилган мазкур талаб юзасидан Профессионал футбол лигасини хабардор қилди. Бироқ ҳозирги кунга қадар «Бунёдкор» футбол клубидан 6 очко олиб ташланмади. Шунингдек, мазкур муаммонинг асосий сабабчиси бўлган украиналик футболчи Сергей Симоненко олдидаги қарздорлик масаласи расман ёпилгани бўйича маълумот ҳам тақдим этмади.
ФИФА низомига кўра, унинг тасарруфида бўлган футбол ассоциациялари талабни сўзсиз бажариши шарт. Йўқса, ташкилот биринчи навбатда Ўзбекистон футбол ассоциациясига нисбатан ўз санкцияларини қўллайди. Вазият жиддийлашса, ЎФАнинг халқаро майдондаги ўйинларда иштирок этиш масаласи ҳам хавф остида қолиши мумкин.
Шундан келиб чиқиб, эндиликда ЎФА Ижроия Қўмитаси Профессионал футбол лигасини бугун — 16 ноябрь куни қабул қилинган №17 қарори билан расман огоҳлантирди ҳамда «Бунёдкор» футбол клубидан 6 очко олиб ташлашни талаб қилди. Бу борадаги мактубга ташкилот расмий шахслари имзо чекди. ПФЛ ФИФА томонидан қўйилган ушбу талабни сўзсиз бажариши, унинг матбуот хизмати эса бу ҳақда жамоатчиликни хабардор этиши керак бўлади.
Эслатиб ўтамиз, Сергей Симоненко 2014 йилнинг январь ойида «Бунёдкор» билан шартнома имзолаган эди. Клубдаги фаолияти давомида 14 та ўйинда майдонга тушган ва Ўзбекистон Суперкубогида ғалабага эришган. Симоненко ўтказган расмий учрашувларнинг ярми Осиё Чемпионлар лигасига тўғри келади. У «Бунёдкор» таркибида битта гол киритишга муваффақ бўлган.
Сергей Симоненко ўз вақтида маош ва мукофот пулларини олмагани учун клуб устидан 2014 йилда ФИФАга шикоят қилганди.
Изоҳ (0)