7 ноябрь куни Жиззах вилояти Шароф Рашидов тумани «Хайробод» МФЙ Р.Бойназаров кўчасидаги хонадонларнинг бирида ёнувчи газ ва ҳаво аралашмасининг чақнаши қайд этилди. Бу ҳақда Жиззах вилоят ИИБ матбуот хизмати «Дарё» хабар берди.

«Шу куни Н.О.нинг уйига жиянлари меҳмонга келади ва тунда шу ерда қолади. Улар дам олаётган хонага ўрнатилган иситиш печи суюлтирилган газ(пропан)га уланган. Кечаси иситиш печида олов ўчиб қолади ва хона ёнувчи газга тўла бошлайди. Тонгги соат 06:00 ларда Н.А. печни ёқиш мақсадида гугурт ёқади ва хонага йиғилган ёнувчи газ ва ҳаво аралашмаси чақнаши содир бўлади. Чақнаш натижасида 1994 йилда туғилган О.С. 70 фоиз, 1995 йилда туғилган Х.Х. 35 фоиз, 1997 йилда туғилган Н.А. 85 фоиз ва 1999 йилда туғилган О.Ш. 35 фоиз куйиш тан жароҳати олиб РИШТЁМ Жиззах филиали жонлантириш бўлимига жойлаштирилган», — дейилади хабарда.

Ҳолат юзасидан суриштирув ишлари олиб борилмоқда.

Кузги-қишки мавсумда об-ҳавонинг кескин совиши натижасида аҳолининг иссиқликка бўлган талаби сезиларли равишда ошади. Бундай ҳолатда носоз, ностандарт ёки қўлбола иситиш печларидан фойдаланиш чақнаш, ёнғин ёки ис газидан заҳарланиш каби нохуш ҳолатларга сабаб бўлиши мумкин. Шу сабабли Жиззах вилояти ИИБ Ёнғин хавфсизлиги бошқармаси фуқароларни огоҳликка чақириб, электр ускуналари ва иситиш печларидан фойдаланишда ёнғин хавфсизлиги қоидаларига қатъий амал қилишни сўрайди.