Ўзбекистон ва Россия синов лойиҳаси доирасида миллий валюталардаги ҳисоб-китоблар устида ишлайди. Бу ҳақдаги келишувга Ўзбекистон Олий Мажлис Сенати раиси Ниғматилла Йўлдошевнинг Москвага сафари чоғида эришилди, деб ёзади «Podrobno.uz».
«Биз ҳамкорлигимизнинг фойдаланилмаган салоҳиятини ишга солишимиз — савдо айланмасини кескин оширишимиз ва диверсификациялашимиз керак. Айнан шу сабабли давлатларимиз раҳбарлари бу кўрсаткични 10 миллиард долларгача етказиш зарур деб ҳисоблайди», — деди Ниғматилла Йўлдошев Федерация Кенгашидаги музокараларда.
«Сизнинг маҳсулотни, айниқса, учинчи мамлакатлар орқали олиб келадиган ишлаб чиқарувчиларингизда кўпинча пулни Ўзбекистонга қайта ўтказиш бўйича муаммолар пайдо бўлади. Уларга турли тузилмалар маълум бир схемаларни таклиф қилади. Баъзан бу схемалар криминалдир. Устига-устак улар бунда пул ҳам йўқотади», — деди Федерация Кенгашининг аграр ва озиқ-овқат сиёсати бўйича қўмитаси раиси биринчи ўринбосари Сергей Лисовский.
Натижада парламентарийлар синов лойиҳасини яратишга ҳамда Ўзбекистон ва Россиянинг бир нечта ҳудудлари мисолида миллий валютада ҳисоб-китобларни ишлаб чиқишга келишиб олди.
Изоҳ (0)