Халқ таълими вазирлигининг Ахборот хизмати тарқатган хабарга кўра, Бекобод тумани халқ таълими бўлими бошлиғи Ҳасан Соибназаров даврий нашрларга мажбурий обуна тўғрисида берган кўрсатмаси учун ўз лавозимидан озод этилди, деб ёзади ЎзА.
Хабарда айтилишича, жорий йил 1 ноябрь куни бир неча интернет нашрларида тумандаги умумтаълим мактаб ўқитувчилари 2019 йил учун обунага мажбурланаётганлиги ҳақида мақолалар чоп этилгач, Халқ таълими вазирлиги мутахассислари ушбу маълумотларни жойига чиқиб ўрганган.
Вазирлар Маҳкамасининг 2002 йил 25 январдаги 33-сонли Қарорининг 5-бандида қишлоқларда жойлашган умумтаълим мактабларини ўнтагача газета ва журналларга маҳаллий бюджет ҳисобидан обуна қилиш белгиланган.
Ушбу қарор талабидан келиб чиқиб, асосан қишлоқ жойларидаги умумтаълим мактабларига 2019 йил обунаси учун 10 номдаги газета ва журналлар тавсия этилган. Бекобод тумани халқ таълими бўлимига «Тошкент ҳақиқати», «Халқ сўзи», «Бекобод овози», «Маърифат» газеталарига обуна бўлишлари учун маҳаллий бюджет ҳисобидан маблағлар ажратилган.
Тошкент вилояти халқ таълими бошқармасининг Бекобод тумани халқ таълими бўлими бошлиғи Ҳасан Соибназаров томонидан ўзбошимчалик билан 2018 йил 30 октябрда имзоланган 01-650/18-сонли хатида тумандаги жами 57 умумтаълим мактаблари директорларига бир нечта газета-журналларга обуна бўлиш вазифаси юклатилган.
Таъкидлаш лозимки, Ўзбекистон Республикаси Президентининг 2018 йил 14 августдаги «Ёшларни маънавий-ахлоқий ва жисмоний баркамол этиб тарбиялаш, уларга таълим-тарбия бериш тизимини сифат жиҳатидан янги босқичга кўтариш чора-тадбирлари тўғрисида»ги қарорида халқ таълими ходимларининг босма нашрларга мажбуран обуна бўлишини ташкил этиш тақиқланган.
Кўрилган чоралар натижасида тумандаги умумтаълим мактабларининг ўқитувчилари Бекобод тумани халқ таълими бўлими бошлиғи хатида кўрсатилган нашрларга мажбурий обуна бўлишмаган.
Ўрганиш натижасида Бекобод тумани халқ таълими бўлими бошлиғи Ҳасан Соибназаров лавозимидан озод этилди ва унинг мажбурий обуна тўғрисидаги кўрсатмаси бекор қилинди.
Шу билан бирга мажбурий обунанинг олдини олиш бўйича керакли чоралар кўрмаганлиги ва тўлиқ назоратга олмаганлиги учун Тошкент вилояти халқ таълими бошқармасининг бошлиғи Шукур Бурхоновга интизомий чора кўрилди.
Ушбу ҳолат юзасидан барча халқ таълими ҳудудий бошқармаларига яна бир бор мажбурий обунанинг олдини олиш бўйича қатъий топшириқ берилди.
Изоҳ (0)