Тошкент вилоятида эллик мингталик қалбаки пуллар ясаб, уларни ишлатиб келган шахс қўлга олинди

Ҳуқуқни муҳофаза қилиш ташкилоти ходимлари Тошкент вилоятида эллик минг сўмлик қоғоз пулларни ясаш билан шуғулланган шахсни қўлга олди, деб ёзади «Podrobno.uz».

22 ёшли йигит бунинг учун олдин график муҳаррирликни, рангли принтердан фойдаланиш сирлари, пул ясаш техникасини чуқур ўзлаштирган.

«Мен аслида тўйлар, туғилган кунларда сураткашлик ва тантаналарни видеотасмага тушириш билан пул ишлардим, — деди у. — Шу йил февраль ойида 50 минг сўмлик пулларни қалбакилаштира бошладим. Олдинига 30 дона шундай пулларни ясаб Олмалиқда буюмлар харид қилиб кўрдим. Икки мартасида омадим келди».

Айни пайтда қалбаки пул ясаш устаси қўлга олинган. Ушбу ҳолат юзасидан Жиноят кодексининг 176-моддаси (Қалбаки пул, аксиз маркаси ёки қимматли қоғозлар ясаш, уларни ўтказиш)га асосан жиноий иш қўзғатилган.

Ўзбекистонда 2018 йил бошидан 51 та қалбаки пул ясаш билан боғлиқ воқеалар содир бўлган. Уларнинг 18 таси Тошкент шаҳрида, 15 таси Тошкент вилоятида, 6 таси Самарқандда кузатилган.

Ҳуқуқни муҳофаза қилиш ташкилоти ходимлари жиноятчилардан 5 минг АҚШ доллари, 5 минг Россия рубли, 5,3 миллион сўм миқдоридаги қалбаки пулларни тортиб олган.