Мутахассис: «Трамадол» наркотиклар билан тенг — биринчи қабул қилишдаёқ тобелик юзага келади

Ўзбекистонда шифокор рецептисиз сотиш тақиқланган кучли таъсир қилувчи ва психотроп дорилар контрабандаси ва ноқонуний айланмаси ҳолатлари кўпайиб қолди, дейилади Sputnik хабарида. Мутахассислар сўзларига кўра, «Трамадол» таблеткаси ўз таъсири бўйича наркотик воситаларга тенг келади.

«Таблеткаларни биринчи марта истеъмол қилишданоқ тобелик юзага келади. Дастлаб одам эйфорияни ҳис қилади, аммо кейинги қабул қилишда организмда оғриқлар ва дискомфорт пайдо бўлади, ундан кейинги доза эса заруриятга айланади. Доза ошиб боради, дорини сотиб олиш учун тобора кўпроқ пул керак бўлиб боради, шу сабабли бу дорига қарам бўлиб қолганлар жиноятларга қўл уради. Бошида оиласининг барча жамғармаларини сарфлайди, кейин уйдан сотиш мумкин бўлган ҳамма нарсани олиб кетади, ундан кейин эса жиноятлар — ўғирлик, талончилик ёки қотилликларни ҳам амалга ошириши мумкин», — деди нарколог.

Ўзбекистонда бундай препаратларни ноқонуний тарқатишга қарши фаол кураш давом этмоқда. Сўнгги бир неча ой ичида жами ўн минглаб долларлик психотроп моддалар партиялари мусодара қилинди.

Ўзбекистонда шифокор рецептисиз сотиш тақиқланган психотроп ва наркотик воситалар рўйхатига айни пайтда 238 номдаги моддалар киради. Улар орасида «Трамадол» ҳам бор. У марказий асаб тизимига таъсир қилувчи оғриқ қолдирадиган доридир.