Деҳлида «Ўзбекистон—Ҳиндистон: маданиятлар мулоқоти» кўргазмаси ўз ишини якунлади. Бу ҳақда Ўзбекистоннинг Ҳиндистондаги элчихонаси матбуот хизмати «Дарё»га маълум қилди.

Ўзбекистон президенти Шавкат Мирзиёевнинг Ҳиндистонга давлат ташрифи арафасида Ҳиндистон миллий музейида очилган кўргазма бир ой — 25 сентябрдан 25 октябрга қадар давом этди.

Кўргазма ҳинд аудиториясида катта қизиқиш уйғотди, унга 7 мингдан ортиқ одам, жумладан, таниқли давлат ва жамоат арбоблари, олимлар, дипломатлар, ОАВлари ва академик доиралар ташриф буюрди.

Ҳиндистон миллий музейи бир ой давомида Ўзбекистон ва Ҳиндистон халқларининг диний ва маданий қадриятларини намоён этувчи ноёб қўлёзмалар ва миниатураларни ташриф буюрувчилар эътиборига ҳавола қилди.

Кўргазманинг ёпилиш маросими ҳам меҳмонларнинг кенг даврасини тўплади. Ўзбекистоннинг Ҳиндистондаги элчиси Фарҳод Арзиев тадбирда чиқиш қила туриб лойиҳа ҳамкорлари ва ташкилотчиларига миннатдорлик билдирди.

Ўзбекистоннинг Деҳлидаги элчихонаси Ҳиндистон миллий музейига Маҳатма Гандининг Ўзбекистонда ўзбек тилида чоп этилган «Менинг ҳаётим» (Тҳе сторй оф мй лифе) асарини совға қилди.