Адлия вазирлиги томонидан жорий йилнинг 27 октябрь куни туман (шаҳар) давлат нотариал идоралари ходимлари иштирокида видеконференция шаклида ўқув-семинар машғулоти ўтказилди. Бу ҳақда «Дарё»га Адлия вазирлиги Жамоатлик билан алоқалар бўлими хабар берди.
Ўқув-семинар машғулоти Давлат раҳбарининг 2018 йил 25 майдаги «Низоларни олдини олишга қаратилган институт сифатида нотариат тизимини янада такомиллаштириш чора-тадбирлари тўғрисида»ги қарори ижросини таъминлаш мақсадида ўтказилган.
Адлия вазири ўринбосари А. Тошқулов раислигида бўлиб ўтган семинарда вазирлик масъул ходимлари томонидан «Юридик ёрдам ва ҳуқуқий хизматлар кўрсатиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги Қонуни, нотариат соҳаси билан бир қатор қонун ҳужжатларига киритилган ўзгартириш ва қўшимчалар, кўчмас мулкнинг олди-сотди, айирбошлаш ва ҳадя қилиш битимларини идоралараро электрон ҳамкорликни қўллаган ҳолда нотариал тасдиқлаш тартибини амалга оширишда юзага келаётган муаммолар ҳамда уларни бартараф этиш тартиби ҳақида тўхтатилиб ўтилди.
Семинарга таклиф этилган Бош прокуратураси ҳузуридаги Иқтисодий жиноятларга қарши курашиш департаментининг масъул ходими К.Зарипов нотариал идоралар ва адвокатлик тузилмаларида жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича ички назорат қоидалари талабларига риоя этилиши ҳақида тушунтиришлар бериб ўтди.
Шунингдек, Адлия вазирлиги томонидан айрим туман (шаҳар) давлат нотариал идоралари фаолиятида ўтказилган «сирли мижоз» ҳамда рейд тадбирларида аниқланган хато ва камчиликларга келгусида барҳам бериш тўғрисида огоҳлантириш берилди.
Ўқув-семинарида нотариал амалиётда вужудга келаётган долзарб масалалар муҳокама қилинди ва республика бўйича бир хил амалиётни жорий этиш ҳамда қонун ҳужжатлари нормаларини тўғри қўллаш бўйича туман (шаҳар) давлат нотариал идораларига тавсия ва кўрсатмалар берилди.
Адлия вазирлиги томонидан мазкур турдаги ўқув-семинар машғулотлари тасдиқланган график-режага асосан доимий равишда ўтказиб борилади.
Изоҳ (0)