Қибрай туманидаги «Боғишамол» маҳалла фуқаролар йиғини раиси 1,5 миллион сўм пора олаётганида қўлга тушди. Маҳалла раиси фуқароларнинг бирига уй-жой кадастр бўлимига топшириш учун нотурар жой бўйича маълумотномани ёзиб бериш учун пора сўраган.
Маҳалла раиси 16 октябрь куни ўз хизмат хонасида, маълумотнома сўраган фуқародан 1,5 миллион сўм пулни олаётганида Тошкент вилояти ИИБ ЖҚБ Коррупция ва иқтисодий жиноятларга қарши курашиш бўлими ҳамда Қибрай тумани прокуратураси ходимлари томонидан қўлга олинган.
«Ушбу ҳолат юзасидан Иқтисодий жиноятларга қарши курашиш департаментининг Қибрай тумани бўлими томонидан маҳалла раисига нисбатан Жиноят кодексининг 210-моддаси («пора олиш») 1-қисми билан жиноят иши қўзғатилган», — дейилади ИИВ ахборотида.
Ушбу модда бўйича айбдор деб топилган шахс энг кам ойлик иш ҳақининг эллик баравари (9 215 000 сўм)дан юз баравари (18 430 000 сўм)гача миқдорда жарима ёки муайян ҳуқуқдан маҳрум этилган ҳолда 2 йилдан 5 йилгача озодликни чеклаш ёхуд 5 йилгача озодликдан маҳрум қилиш билан жазоланади.
Изоҳ (0)