Президентнинг Францияга давлат ташрифи доирасида мамлакатдаги Марказий Осиё давлатлари янгиликларига ихтисослашган Novastan.org сайтида «Ўзбекистон: Ёшлар мавзуси — Шавкат Мирзиёев учун энг долзарб соҳа» деб номланган мақола эълон қилинди. Бу ҳақда «Дарё»га Ёшлар медиа маркази маълум қилди.
Мақолада Марказий Осиё аҳолисининг ярмини ташкил қилувчи Ўзбекистон аҳолиси демографик жиҳатдан ёш эканлиги, шу сабабдан мамлакатда ёшлар сиёсати муҳим ўрин эгаллаши таъкидланган.
«33 миллион аҳолиси бор Ўзбекистон аҳолисининг тахминан 20 фоизи 15—24 ёш атрофида. Бу аҳолининг демографик жиҳатдан ёш эканлигини, шу сабабдан давлат ёшларга оид аниқ ва самарали сиёсат бориши лозим эканлигини кўрсатади. Президент Шавкат Мирзиёевнинг Францияга ташрифи Ўзбекистоннинг ёшларга оид сиёсатини таништириш учун айни қулай фурсатдир», —дейилади мақолада.
Шундан кейин мақолада олдинги пайтларда Ўзбекистонда советларнинг ёшлар сиёсати амал қилганлиги, мустақилликдан кейин эса «Камолот» ҳаракати ва «Камалак» ташкилотлари тузилганлигини қисқача эслатиб ўтилади. «Камолот» ёшлар ҳаракати самарасиз фаолият олиб борганлиги ва натижада бундан на давлатга, на ёшларга фойдаси бўлмаганлиги таъкидланади.
Шу сабабдан 2016 йилда президентликка келган Шавкат Мирзиёев зудлик билан бу ҳаракатни тугатиб, унинг ўрнига 2017 йил 27 июнда Ёшлар иттифоқини ташкил қилганлигини ҳамда «Камалак» ташкилотида тегишли ислоҳотларни амалга оширганлиги айтилади. Бундан ташқари, Ўзбекистонда мактабгача таълим вазирлиги ташкил этилганлиги қўшимча қилинади. Сўнгра Президентнинг ташаббуси билан Ўзбекистон ёшлари учун қилинган ишлар санаб ўтилади.
Мақола Ёшлар Иттифоқининг фаолияти ва ўзбек оммасининг ёшлар муаммоларига нисбатан муносабатига холис баҳо бериш билан якунланади:
«Тўғри, Ёшлар иттифоқи ва ’Камалак’ ташкилотининг фаолияти фақатгина муваффақиятлардан иборат эмас. Аксинча, улар баъзида ’Камолот’ ҳаракати йўл қўйган хатоларни такрорлаб туради. Уларнинг ҳар бир ташаббуси иштимоий тармоқларда қизғин баҳс ва мунозаларга сабаб бўлади. Ҳатто баъзан Ёшлар иттифоқи Ўзбекистоннинг энг кўп танқид қилинадиган ташкилотидай тасаввур пайдо бўлади.
Бироқ мазкур танқидларнинг мавжуд эканлиги ўзбек оммасининг ёшлар муаммоларига бефарқ эмаслигини кўрсатиб беради. Шу маънода, Шавкат Мирзиёевнинг ёшлар соҳасига жиддий ёндашиши ва ёшлар учун барча шароитларни яратиб бериши ўзбек оммасининг ёшлар муаммоларига нисбатан муносабати билан уйғундир. Яратиб берилган имкониятлардан унумли фойдаланиш Ёшлар иттифоқи ва «Камалак» ташкилотининг ўзини қўлида», — хулоса қилинади мақолада.
Изоҳ (0)