Бу кўҳна дунёни аёл зотисиз бир лаҳза ҳам тасаввур қилиб бўлмайди. Унинг меҳр-у муҳаббати бор экан, ҳаёт турфа рангларда жилваланиб, янада гўзаллашиб бораверади. Нозик ҳилқат вакили бўлмиш аёл ўзининг нодир фазилатлари билан биз эркакларнинг кўнглимизга йўл топиб, қувонч-у шодлигимизга доимо шерикдир.
Журналист Миролим Исажонов таниқли эркак ижодкорларни нозик ҳилқат вакилларининг қайси фазилатлари ҳайратга солишига қизиқиб, уларга мурожаат қилди.Бир поғона пастда туриши шарт
Рустам Саъдуллаев, Ўзбекистон Республикасида хизмат кўрсатган артист:
— Мен аввало, нозик ҳилқат вакилларининг яқинларига бўлган юксак эътиборини алоҳида қадрлайман. Агарда аёл киши турмуш ўртоғи ва фарзандларига эътиборли, ҳамиша уларнинг камчиликларини тўлдириб турса, бундай оилада албатта, бахт ва барака ҳукмрон бўлади, фарзандлар ҳам онасидан ибрат олади.
Аёл киши ҳар жиҳатдан ҳавас қилгудек бўлиши лозим. Шунингдек, саришта, самимий ва аҳил-иноқликни хуш кўрувчи аёлларни ҳам яхши кўраман. Манманлик, кибр-ҳавога тезда берилиб кетадиган, ёлғон гапириб, эрдан ва ўзидан катталардан берухсат, ўзбошимчалик билан бирор ишни амалга оширувчи аёлларни эса очиғи, унчалик ҳам хушламайман. Айниқса, муқаддас қўрғонда эридан устун бўлишга интилувчи опа-сингилларимизни кўрсам, жудаям жаҳлим чиқади. Бу ўзбек аёлларига тўғри келмайдиган хунук одат. Аёл барибир ҳам аёл. У эркак кишидан бир поғона пастда туриши шарт.Меҳнаткашлигини яхши кўраман
Аваз Охун, қизиқчи:
— Мен бўш вақтини беҳуда нарсаларга эмас, аксинча бордан йўқ қилишга одатланган, меҳнаткаш аёлларни яхши кўраман. Ёшлик чоғларимда шундай аёлларни кўрганманки, улар умр бўйи ҳалол меҳнат қилиб, фарзандларини бировдан кам бўлмай, улғайишига астойдил ҳаракат қилишган. Суяги меҳнатда қотган бу каби аёллар камдан-кам ҳолларда касал бўлишарди. Унда ҳам бирор жиддий касалликдан азият чекишмасди. Афсуски, замон шиддат билан ривожлангани сари бундай аёлларимиз сони камайиб бормоқда. Балки, кунини мазмунсиз нарсалар билан «чоғ» ўтказаётганлар орасида турли касалликлар авж олаётгандир. Истардимки, меҳнаткаш опа-сингилларимиз янада кўпайса. Улар умрининг донишманд фаслида яшаётган нуроний отахон-у онахонлармизнинг ҳаёт йўлларидан ибрат олишса сира кам бўлишмайди.Фаросат аёлни безаб туради
Бекзод Муҳаммадкаримов, Ўзбекистон Республикасида хизмат кўрсатган артист:
— Ёшлик чоғларимда бирор айб иш қилиб қўйсам, раҳматли онам «Болам наҳотки, шу ишни қилишдан олдин унга тушунмаган бўлсанг. Бунинг учун ақлни ишлатиш шарт эмасди, фаросатинг етса бўларди-ку!», деб койиб берарди. Бундай ўйлаб қарасангиз, фаросат жуда ҳам кенг қамровли ва ҳаммада ҳам бўлавермайдиган туғма хислатлардан бири эканлигини англаб етаркансиз. Оилада эркакка нисбатан аёл киши фаҳм-фаросатли бўлиши лозим, деб ўйлайман. Сабаби фаросатли аёл қаерда қандай гап айтишни, вазиятдан қай йўл билан чиқиб кетишни, керак бўлса, турмуш ўртоғини ҳам кўкларга кўтаришни уддалай олади. Шу билан бирга фаросат аёлни безаб туради, унинг гўзаллигига гўзаллик қўшади.
Изоҳ (0)