Баҳодир Жалолов 27 октябрда проф боксдаги 3-жангини ўтказади, рақиб жиддий

Жаҳон чемпионати совриндори, бугунги кунда профессионал боксда фаолият олиб бораётган ўзбекистонлик супероғир вазнли чарм қўлқоп устаси Баҳодир Жалолов навбатдаги жангини кимга қарши ўтказиши маълум бўлди, деб ёзади МОҚ матбуот хизмати.

29 сентябрь куни фаолиятидаги 2-жангида Баҳодир Жалолов мексикалик Эдуардо Вителани мағлубиятга учратганди. Энди у профессионал фаолиятидаги учинчи жангини америкалик Тайрел Райтга қарши ўтказади. Олти раундлик жангга 27 октябрь санасида Нью-Йорк шаҳридаги машҳур Madison Square Garden аренаси мезбонлик қилади.

Маълумот учун, Баҳодир Жалолов шу кунгача проф рингда икки маротаба жанг ўтказиб, уларнинг ҳар иккисида рақибларини нокаут эвазига мағлуб этган. Профессионал боксдаги фаолиятини 2012 йилда бошлаган Райт эса 13 маротаба рингга кўтарилиб, уларнинг 9 тасида ғалаба қозонган ( 6 та жангда нокаут эвазига рақибларидан устун келган). 2 та баҳсда имкониятни бой берган. Яна 2 та жангда дурангга рози бўлган.