Фарғона вилояти ҳокими Тошлоқ туман ҳокими Шуҳрат Абдусаломов, туман ҳокимининг биринчи ўринбосари Б.Султонов ҳамда туман ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари А.Болтабоевга ўз вазифаларини бажаришда сусткашликка йўл қўйгани, аҳоли муаммоларини ҳал этишда талаб даражасида иш олиб бормагани, ўзибўларчиликка ташлаб қўйгани учун ҳайфсан берди. Бу ҳақда «Turon 24» хабар бермоқда.
29 сентябрь куни Фарғона вилояти ҳокимлигида вилоятда бу йилги куз-қиш мавсумига тайёргарлик бўйича ўтказилган йиғилиш танқидий руҳда ўтган. Республика ишчи гуруҳи томонидан 19—28 сентябрь кунлари Тошлоқ туманида ижтимоий-маънавий вазият ва аҳолининг яшаш шароитларини ўрганиш натижалари ҳам таҳлил этилган.
Йиғилишни вилоят ҳокими Шуҳрат Ғаниев олиб борган. Унда Ўзбекистон Президентининг маслаҳатчиси, ишчи гуруҳ раҳбари Умар Сафаев ҳам ўрганиш якунлари бўйича маъруза қилган.
Шу билан бирга йиғилишда туман депутатларининг фаолияти қониқарли эмаслиги танқид қилинган.
Президент Шавкат Мирзиёевнинг топшириғига кўра Республика ишчи гуруҳи жорий йил бошидан вилоятнинг Риштон, Қува, Ўзбекистон, Қўштепа, Ёзёвон, Бағдод, Бувайда, Учкўприк туманлари ҳамда Қўқон шаҳрида ижтимоий-маънавий вазият ва аҳолининг яшаш шароитларини ўрганган.
Изоҳ (0)