30 сентябрь куни Қашқадарё вилояти Фавқулодда вазиятлар бошқармасидан 29 сентябрь куни соат 21:25 да олинган маълумотга асосан, жорий йилнинг 28 сентябрь куни вилоят юқумли касалликлар шифохонасига 16 нафар ва 29 сентябрь куни 7 нафар, жами 23 нафар фуқаролар овқатдан заҳарланиш «Ўткир гастроэнтерит» ташхиси билан ётқизилгани ҳақида хабар берилган эди.
Хабарда қайд этилишича, улар жорий йилнинг 27 сентябрь куни Қарши шаҳридаги «Бахтли оила» тўйхонасида тўй маросимида турли хилдаги озиқ-овқат маҳсулотларини аралаш истеъмол қилишиб, соғлигидан шикоят қилган.
Орадан бир кун ўтиб, Ўзбекистон Республикаси Соғлиқни сақлаш вазирлиги матбуот хизмати томонидан юқоридаги ташхис билан ётқизилган беморлар жами сони 74 нафар (шундан 4 нафари 18 ёшгача бўлганлар, 10 нафар эркак ва 60 нафар хотин-қизлар), шифохонага ётқизилганлар сони 72 нафар, уйига жавоб берилганлар 2 нафарни ташкил этгани, ётқизилган 72 нафар беморнинг аҳволи ўртача енгил ҳолатда экани маълум қилинди. Соғлиқни сақлаш вазирлиги хабарида улар тўй дастурхонига тортилган турли салатларни истеъмол қилиб, заҳарлангани айтиб ўтилиб, айбдорларга тегишли чоралар кўрилгани маълум қилинган.
«Халқ сўзи»нинг вилоятдаги мухбири воқеани жойига чиқиб ўрганди. Суриштирув давомида заҳарланиш ҳолати ҳақиқатдан ҳам Қарши шаҳридаги «Бахтли оила» маросимлар уйида бўлган тўйда иштирок этганлар экани аниқланди.
Шифохонадан маълум қилишларича, тўй кундузи соат иккиларда бошланган. Кечки соат 19:00 ларга келиб, Қашқадарё вилоят юқумли касалликлар шифохонасига «ўткир гастроэнтерит» ташхиси қўйилган дастлабки беморлар кела бошлаган.
Навбатчи шифокор Баҳром Шодиевнинг айтишича, худди шу шикоят билан шифохонага жуда кўп одам мурожаат қилган. Шу боис шифохона тўрт кундан бери кучайтирилган режимда ишламоқда.
«Барча жабрланганлар керакли муолажалар ўтказилмоқда, уларга зарур препаратлар берилмоқда. Жабрланганлар орасида болалар ҳам бор, уларнинг сони 25 нафар. Болаларнинг аҳволи қониқарли», — дейди Баҳром Шодиев.
«Жиянларим 20 ёшли Юлдуз ва 17 ёшли Умидани тўйдан кейин учратдим. Улар соғлиғидан шикоят қила бошлашди ва биз дарҳол касалхонага бордик. Уларга ўткир гастроэнтерит ва сальмонеллёз ташхиси қўйилди. Касалхонага келганда заҳарланганлар фақат улар эмаслигини билдик. Афсус қувончли кун бундай воқеа ёқимсиз ҳодиса билан якунланди», — дейди Марҳабо Наимова.
Шифохона бош шифокори жуда бандлиги боис воқеага изоҳ беришдан бош тортди. Бироқ, қабул қилиш бўлимининг ҳамшираларидан бири Шаҳзода Эшмуродованинг айтишича, сўнгги кунлари касалхонага 400 нафарга яқин киши худди шундай шикоят билан мурожаат қилган. Уларнинг ҳаммаси ҳам шифохонага ётқизилмаган. Шифохонага қолишни истамаганлар, муолажалар ва инъекцияларни қабул қилиб, уйда даволанишга кетган.
«Бахтли оила» ресторани Қашқадарёдаги энг йирик маросимлар уйларидан бири бўлиб, бир вақтнинг ўзида 600 нафар меҳмонни қабул қилиш имкониятига эга. 27 сентябрь куни бу ерда ўтказилган тўй маросимида у меҳмонлар билан тўла бўлган.
Ўзбекистон Республикаси Соғлиқни сақлаш вазирлиги матбуот хизмати томонидан маълум қилинишича, вилоят Юқумли касалликлар шифохонасида махсус штаб ташкил этилди, айни пайтда Республика санитария-эпидемиология назорати марказининг малакали мутахассислари ушбу штабга жалб этилиб, амалга оширилиши лозим бўлган тадбирлар белгилаб олинди, беморларга сифатли тиббий ёрдам кўрсатиш мақсадида барча зурур дори-дармонлар захираси яратилган.
Изоҳ (0)