Инновацион ривожланиш вазирлиги Президент ҳузуридаги Давлат бошқаруви академияси билан ҳамкорликда уч йилда бир марта ўтказадиган истиқболли бошқарув кадрларини саралаш бўйича «Тараққиёт» танлови талабгорларини рўйхатга олиш босқичи бошланди. Бу ҳақда «Дарё»га вазирлик матбуот хизмати маълум қилди.
Танловнинг мақсади давлат, хўжалик ва махаллий ижро бошқаруви органларидаги юқори малакали кадрларни аниқлаш, рағбатлантириш ва қўллаб-қувватлашдан иборат.
Танловда таянч олий маълумотга ва тегишли соҳада раҳбарлик лавозимида камида уч йиллик иш тажрибасига эга, 30 ёшдан 45 ёшгача бўлган (45 ёш ҳам қўшилган ҳолда) Ўзбекистон фуқаролари иштирок этиши мумкин.
Танловда талабгорлар 16 та номинация бўйича ўз соҳасидан келиб чиқиб иштирок этади. Номинациялар билан «Taraqqiyot-tanlov.uz» сайтида танишиш мумкин.
Танлов ғолибларига энг кам иш ҳақининг 50 баравари миқдорида, финал босқичининг қолган иштирокчиларига эса энг кам иш ҳақининг 25 баравари миқдорида бир марталик пул мукофоти тўланади.
Шунингдек, танлов ғолиблари ривожланган хорижий мамлакатларнинг соҳага оид ташкилотларида амалиёт ўташни ўз ичига оладиган «Бошқарув кадрларини тайёрлаш бўйича Президент дастури»га мувофиқ уч ойлик курсларда ўқийди ва уни ўтагандан сўнг тегишли йўналишлар бўйича давлат ташкилотларида раҳбарлик лавозимларига тайинланади.
Танловда иштирок этиш учун «Taraqqiyot-tanlov.uz» сайтига кириб, рўйхатдан ўтиш, бунинг учун эса албатта, «ID.uz» порталидан рўйхатдан ўтган бўлиш шарт. Талабгорлар жорий йилнинг 1 октябридан 30 октябрига қадар рўйхатдан ўтишлари керак.
Изоҳ (0)