1 октябрь — Ўқитувчи ва мураббийлар куни муносабати билан Термиз шаҳридаги муҳташам Санъат саройида ўтказилган байрам тадбирига вилоятнинг барча ҳудудларидан илғор ўқитувчилар, ижодий-маърифий танловларда муваффақиятли иштирок этган педагоглар, фахрий устозлар таклиф этилди. Бу ҳақда «Дарё»га Сурхондарё вилоят ахборот хизмати хабар берди.
Тадбирда соҳа ривожи учун камарбаста бўлган ходимлардан бир гуруҳига вилоят ҳокимлигининг фахрий ёрлиқ ва эсдалик совғалари топширилди.
Вилоят мусиқали драма театри жамоаси томонидан қайта саҳналаштирилган «Алишер Навоий» спектакли намойиши бошланганда томошабинлар Ўзбекистон ва Қорақалпоғистон халқ артисти Муҳаммадали Абдуқундузовнинг чиқишини гулдурос қарсаклар билан олқишлашди. Муваффақиятли саҳналаштирилган спектакл давомида инсонлар бахт-у саодати, халқ фаровонлиги, мамлакат ободонлиги учун улкан ҳисса қўшган Алишер Навоий образи талқини ўқитувчи ва мураббийларни улуғ шоир шахсига янада яқинлаштирди.
Шундан сўнг байрам тадбири тўкин дастурхон атрофида давом этди. Илм-у маърифат чароғбонлари – ўқитувчи ва мураббийларга билдирилган самимий тилаклар-у табриклар қўшиқ ва рақслар гулдастасига уланиб кетди. Санъат усталари ва истеъдодли ёш ижрочилар иштирокидаги концерт намойиши байрам тароватига ўзгача кайфият, қувонч бағишлади.
Тантанали тадбирда Сурхондарё вилояти ҳокими Баҳодир Пўлатов иштирок этди.
Изоҳ (0)