Қашқадарё вилоятида Жануби-ғарбий махсус ҳарбий округ бошқарув аппарати ҳарбий хизматчилари томонидан 1 октябрь — Ўқитувчи ва мураббийлар куни муносабати билан тадбир ўтказилди. Бу ҳақда Мудофаа вазирлиги матбуот хизмати «Дарё»га маълум қилди.
Тадбирда ЖҒМҲО қўмондонлиги, Қарши шаҳар бош имом-хатиби Аҳмад Бойқобилов, Қарши муҳандислик иқтисодиёт институти доценти Қаҳрамон Маҳманазаров, Ўзбекистон Республикаси санъат арбоби Исоқ Тўраев иштирок этиб, мамлакатимизда тинчлик ва барқарорлик ҳамда ижтимоий-иқтисодий соҳаларда амалга оширилаётган ислоҳотлар борасида сўз юритдилар.
Хусусан, «Ватанпарварлик олий фазилат», «Дин ‘оммавий маданият’ни қоралайди» ҳамда «Ғоя ва мафкуранинг ўрни» мавзусида маърузалар ўқилди.
Шунингдек, ҳарбий хизматчилар учун Ўзбекистон Қаҳрамони, Ўзбекистон халқ шоири Абдулла Орипов номидаги мактаб-интернатига экскурсия уюштирилди.
Мактабда Абдулла Орипов музейи ҳам жой олган бўлиб, у ердаги экспонатлар ҳарбий хизматчиларда катта қизиқиш уйғотди.
Қарши шаҳрида жойлашган мазкур мактаб-интернат 2017—2018-ўқув йилидан 5—9-синфларда 150 нафар иқтидорли ўқувчи ҳамда 16 нафар ўқитувчи, 7 нафар тарбиячи билан ўз фаолиятини бошлаган. Мактаб-интернатда энг замонавий технологиялар, сўнгги русумдаги компьютерлар билан жиҳозланган 14 та ўқув хонаси, кимё, биология, физика фанлари учун лаборатория хоналари, илмий ва бадиий адабиётлар билан бойитилган кутубхона, 50 ўринга мўлжалланган, барча шарт-шароитга эга ётоқхона ҳамда ўқувчиларнинг ижод қилишларига мўлжалланган замонавий кўринишдаги ижодхона мавжуд.
Кечга яқин эса шаҳар марказида жойлашган «Ёшлар хиёбони»да округ ҳарбий оркестри томонидан ижро этилган куй-қўшиқлар шаҳар аҳолисига ўзгача кайфият баҳш этди.
Изоҳ (0)