Тошкентдаги хусусий болалар боғчаси мудираси 1 яшар боланинг юзига урди
Тошкент шаҳри Яккасарой туманидаги Baby Univer хусусий болалар боғчаси мудираси 1 ёш-у 10 ойлик тарбияланувчини йиғлашдан тўхтатиш учун унинг юзига урган, деб ёзади UzNews боланинг онасига таяниб.
Аёл боласининг юзидаги қизил доғларни ва бурнидаги кўкарган жойни уни боғчадан уйга олиб кетишда пайқаган. Муассаса мудираси буни бола бошқа тарбияланувчилар билан муштлашиб қолгани билан изоҳлаган.
Аммо тиббий экспертиза жароҳатлар катта одам томонидан етказилганини тасдиқлаган.
25 сентябрь куни Яккасарой маъмурий судида ушбу иш бўйича суд мажлиси бўлиб ўтди. Боғча мудираси Маъмурий жавобгарлик тўғрисидаги кодекснинг 52-моддаси («Енгил тан жароҳати етказиш») бўйича айбдор деб топилиб, энг кам ойлик иш ҳақининг 3 баробари миқдорида жаримага тортилди.
Суд мажлисида айбланувчи айбига тўлиқ иқрор бўлиб, қилмишидан пушаймон бўлган ва кечирим сўраган.
Бироқ жабрланувчи томон жазо болага етказилган зарарга мувофиқ эмас, деб ҳисоблайди.
