Навоий вилоятининг Кармана шаҳри, Ислом Каримов кўчасида янги инновацион лойиҳа асосида «Хавфсиз пиёдалар йўлакчаси» қуриб битказилди. Бу ҳақда «Халқ сўзи» хабар бермоқда.
Мазкур ҳудудда ҳаракат хавфсизлигини назорат қилувчи кўп функцияли «АутоcomМТР/уз» аппарат-дастурий комплекси ўрнатилиб, фойдаланишга топширилди.
Йўлакча сутканинг барча пайтида пиёдалар хавфсизлигини бирдек таъминлаш мақсадида мураккаб электрон воситалар билан жиҳозланган.
Хусусан, ушбу пиёдалар йўлакчасига 50 ва 30 метр етмасдан виброшовқинли қопламалар ётқизилган бўлиб, улар ҳайдовчинининг сергаклигини ошириш билан бирга йўлакчага яқинлашаётганлигидан огоҳ этади. Шунингдек, махсус қурилмалар пиёда йўлакка кириши билан ишга тушиб, ўта сезгир детекторлар ёрдамида йўлакка пиёда кираётганлиги тўғрисидаги огоҳлик сигналини ҳаракатланаётган пиёда тасвири акс этган йўл белгисига узатилади. Ушбу сигнал ҳайдовчиларни йўлакчада пиёда ҳаракатланаётганидан огоҳ этади.
«Келгусида ушбу ҳудудда йўл ҳаракати қоидабузарликларини фиксация (қайд) қилувчи 2 та ҳамда пиёдалар йўлакчасидан ўтаётган фуқароларни назорат қилувчи 2 та видеокамера ўрнатилади. Шу орқали пиёдалар хавфсизлигини таъминлаш билан бирга йўл ҳаракати қоидабузарликларининг олди олинади», — дейди вилоят ИИБ ЙХХБ матбуот хизмати раҳбари Элмурод Ашуров.
Изоҳ (0)