Самарқанд вилоят Адвокатлар палатаси раҳбари Отабек Ахтамов 3 сентябрь куни ДХХ ходимлари томонидан 12 минг АҚШ доллар олаётган пайтда қўлга тушгани ҳақида хабар берган эдик.
Ушбу ҳолат бўйича Самарқанд вилоят прокуратураси расмий маълумот тақдим этди. Бу ҳақда «Дарё» мухбири Фарҳод Норбўтаев хабар бермоқда.
Жорий йилнинг 3 сентябрь куни фуқаро Н.Каримова вилоят прокурори номига ариза билан мурожаат қилиб, унда ТИФ «Миллий банк» Самарқанд вилоят бўлими мансабдор шахсларига нисбатан қўзғатилиб, тергов ҳаракатлари ўтказилаётган жиноят иши юзасидан синглиси Ф.Бобоқулованинг ҳуқуқларини ҳимоя қилиш учун Адвокатлар палатаси Самарқанд вилоят ҳудудий бошқармаси бошлиғи О.Ахтамов билан шартнома тузганлигини, О.Ахтамов унга жиноят иши бўйича Ф.Бобоқуловага енгиллик қилиб бериш масаласини вилоят прокуратураси мансабдор шахслари орқали 20 минг АҚШ доллари эвазига ижобий ҳал қилиб беришини айтиб, мансабдор шахсга пора беришга қизиқтириб, далолат қилганлиги, ушбу пулларни талаб қилиб келаётганлигини, ҳимоячиси О.Ахтамовга нисбатан қонуний чора кўришни сўраган.
2018 йил 4 сентябрь куни соат 14:35 ларда Н.Каримованинг аризаси юзасидан ўтказилган тезкор тадбир давомида, Адвокатлар палатаси Самарқанд вилоят ҳудудий бошқармаси бошлиғи — «Қомус» адвокатлар ҳайъати бошқарувчиси, ҳимоячи О.Ахтамов хизмат мавқейидан фойдаланган ҳолда ўзининг ғараз ва бошқа манфаатларини кўзлаб, ТИФ «Миллий банк» Самарқанд вилоят бўлими мансабдор шахсларига нисбатан тергов ҳаракатлари ўтказилаётган жиноят иши бўйича айбланувчи — ҳимояси остида бўлган фуқаро Ф.Бобоқулова томонидан етказилган зарарни йўқ қилиб бериш, вилоят прокуратураси мансабдор шахслари орқали ижобий ҳал қилиб бериши эвазига Ф.Бобоқулованинг опаси Н.Каримовадан келишилган 20 минг АҚШ долларидан 11 минг 900 АҚШ доллари пул маблағларини фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан вилоят прокуратураси томонидан О.Ахтамовга нисбатан Ўзбекистон Республикаси Жиноят Кодексининг 168-моддаси 4-қисми «а» банди ва 28, 211-моддаси 3-қисми «а» банди билан жиноят иши қўзғатилиб, О.Ахтамовга нисбатан «қамоқ» эҳтиёт чораси танланган.
Жиноят иши юзасидан дастлабки тергов ҳаракатлари вилоят прокуратураси Уюшган жиноятчилик ва коррупцияга қарши курашиш бўлими томонидан олиб борилмоқда.
Изоҳ (0)