Жорий йилда Қорақалпоғистон Республикаси Вазирлар Кенгаши ва вилоятлар ҳокимликларининг таклифига асосланган ҳисоб-китобларга мувофиқ пахта терими мавсумида 26 минг 467 та терим отряди ташкил этилиши ва 2 миллион 639 минг нафар теримчи жалб қилиниши белгиланди. Бу ҳақда бугун, 5 сентябрь куни Ўзбекистон Бош вазири Абдулла Арипов раислигида ўтказилган йиғилишда иштирок этган «Дарё» мухбири Севара Нишонова хабар бермоқда.
«Отряд раҳбари маҳалла раиси ёки бирон бир ташкилот ходими бўлиши мумкин. У юзлаб инсонларни қўл остида бирлаштира олади. Ана шундай инсонларда қўшимча даромад топпиш имконияти яратилмоқда. У ўз асосий ишидан меҳнат таътилига чиқиб, меҳнат вазирлиги бошқармаси билан шартнома тузади. Отряд бошлиғига энг камида икки миллион сўм ойлик тайинланади», — дейди Бош вазир.
Шунингдек, отряд раҳбарларига отряд томонидан терилган 80 тонна пахта хом ашёси учун бир миллион сўм ва 80 тоннадан ошган қўшимча ҳар бир тонна учун эллик минг сўмдан Ўзбекистон Республикаси Бандлик ва меҳнат муносабатлари вазирлиги ҳузуридаги Жамоат ишлари жамғармаси маблағлари ҳисобидан иш ҳақи тўлаб берилади.
«Авваллари теримчилар мактаб, коллеж ёки спорт залларига жойлаштирилган. Бу йил бундай ҳолатга йўл қўйилмайди. Болалар пахта мавсумида ҳам мактабда ўқиши керак. Ҳозирда маҳаллий ҳокимликларга ҳудудда теримчилар учун дала шийпонлари ва палаткалар барпо этиш, борларини таъмирлаш ҳақида топшириқ берилган», — дейди Абдулла Арипов.
Изоҳ (0)