Президент фармонига мувофиқ 100 ёшдан ошган бир гуруҳ ўзбекистонликлар қаторида Фарғона вилояти Учкўприк туманида яшовчи 113 ёшли Шаҳринса момо Позилова ҳам «Шуҳрат» медали билан тақдирланди. Бу ҳақда «Дарё» мухбири Азизжон Эрматов хабар бермоқда.
1905 йилда туғилган Шаҳринса аянинг суяги меҳнатда қотган. Далада кетмон чопди, пахта терди, қурт боқди. Фронт ортида шижоат билан ишлади. Турмуш ўртоғи вафот этгач, икки ўғил, бир қизга ҳам она, ҳам ота бўлиб, бор меҳрини берди. Бугун онахон 40 дан зиёд невара, чеваралари ардоғида.
Вилоят ҳокими Шуҳрат Ғаниев Ш. Позилова истиқомат қилаётган хонадонга бориб, момони Президент номидан табриклаб, «Шуҳрат» медалини тантанали равишда топширди. Мустақилликнинг 27 йиллик байрами билан қутлади.
Ш. Позиловага вилоят ҳокимлигининг совғаси – замонавий телевизор, ногиронлик аравачаси, озиқ-овқат маҳсулотлари ҳам тақдим этилди.
Шаҳринсо момо эътибордан кўнгли яйраб, дуога қўл очар экан, энг аввало, юртга тинчлик, элга хотиржамлик тилади.
– Ҳамиша мени йўқлаб турадиган давлатимдан айланай. Биз кексаларга алоҳида эътибор қаратган Президентга раҳмат! Вилоят раҳбарининг хонадонимга биринчи бор келиши эмас. Мана, яна медални кўксимга таққани келди. Бу йўқловлардан, мукофоту совғалардан бошим кўкка етди, – деди 113 ёшли Шаҳринса момо.
Изоҳ (0)